બારડોલી : બારડોલીમાં વહેલી સવારે છૂટછવાયા વિસ્તારમાં વરસાદી ઝાપટાં પડતાં ખેડૂતોની ચિંતા વધી ગઈ હતી.વાદળછાયા વાતાવરણ વચ્ચે પડેલા કમોસમી વરસાદથી ડાંગર અને કેરીના પાકને મોટા નુકસાનની સંભાવના સેવાઇ રહી છે.છેલ્લા કેટલાક દિવસથી હળવા પવનને કારણે તાપમાનમાં ઘટાડો નોંધાયો છે.દરમ્યાન મંગળવારે વહેલી સવારે 6 વાગ્યાની આસપાસ આકાશમાં કાળા દિબાંગ વાદળો ધસી આવ્યા હતા અને અચાનક વરસાદ વરસવાનું શરૂ થયું હતું.બારડોલી શહેર અને આજુબાજુના ગામડાઓમાં વરસાદી ઝાપટાંને કારણે રસ્તાઓ પર પાણી પાણી થઈ ગયું હતું.વરસાદી ઝાપટાંએ ખેડૂતોની ચિંતા વધારી દીધી હતી.હાલમાં ડાંગર લણણીની સિઝન ચાલી રહી છે.ત્યારે અચાનક વરસેલા વરસાદને કારણે ડાંગરના પાકને નુકસાન થવાની સંભાવના છે.ડાંગરનો પાક તૈયાર થઈ ગયો છે ત્યારે કેટલાક ખેડૂતોએ કાપણી પણ શરૂ કરી દીધી છે.આથી વરસાદને કારણે ખેતરમાં કાપેલું ડાંગર ભીંજાય ગયું હોવાની પણ જાણકારી મળી રહી છે.બીજી તરફ આ વર્ષે વાતાવરણમાં ફેરફારને કારણે કેરીની સિઝન પણ મોડી શરૂ થઈ છે ત્યારે વહેલા વરસેલા વરસાદે કેરી રસિયાઓની મજા પણ બગાડી દીધી છે.વરસાદને કારણે પાકવા આવેલી કેરીમાં જીવાત પાડવાની સંભાવના સેવાઇ રહી છે.સાથે જ પવનને કારણે કેરી પડી જવાથી પણ મોટું નુકસાન થઈ રહયું છે.બીજી તરત વરસાદની ઝાપટાંને કારણે તાપમાનનો પારો ગગડીને 35 ડિગ્રી સુધી આવી જતાં લોકોએ ગરમીથી હાશકારો અનુભવ્યો હતો.
બીજી તરફ કૃષિ વિજ્ઞાન કેન્દ્ર દ્વારા કરવામાં આવેલી આગાહી અનુસાર આગામી પાંચ દિવસ દરમ્યાન આંશિક અંશે વાદળછાયું વાતાવરણ રહેવાની સંભાવના છે પરંતુ વરસાદની કોઈ સંભાવના વ્યક્ત કરવામાં આવી નથી.આ ઉપરાંત પવનની ઝડપ વધુ રહેવાને કારણે કેળાં પકવતા ખેડૂતોને કેળાંની લૂમ પાકવાની અવસ્થાએ હોય તો ટેકા આપવા જણાવવામાં આવ્યું છે.આ ઉપરાંત શેરડીનો પાકને ઢળી પડતો અટકાવવા પાણી ન આપવાની સલાહ આપવામાં આવી છે.
