બારડોલી – કોરોના મહામારી દરમિયાન સહકારી સુગર ફેકટરીઓની ચૂંટણીની પરવાનગી ન આપવા અંગે ગાંગપુર ગામના ખેડૂત સભાસદની લેખિત રજૂઆતથી માહોલ ગરમાયો છે.
ગાંગપુર ગામના સુગર ફેકટરીના સભાસદ સુનિલભાઈ ઈશ્વરભાઈ પટેલે બારડોલી અને ચલથાણ સુગર ફેકટરીની ચૂંટણી યોજવા માટે મંજુરી આપવા બાબતે વાંધો ઉઠાવ્યો છે. તેમણે સરકારના કૃષિ, ખેડૂત કલ્યાણ અને સહકાર વિભાગના ૩૦મી જૂનના જાહેરનામાનો સંદર્ભ ટાંકી કલેકટરને રજૂઆત કરતા જણાવ્યું છે કે,આ જાહેરનામા મુજબ સુગર ફેકટરીઓની ચૂંટણીમાં કોવિડ-૧૯ અને અનલોક-ર તથા સોશિયલ ડિસ્ટન્સિંગ સહિતની ચુસ્તપણે પાલન થાય તે માટે જિલ્લા કલેકટરની પરવાનગી લેવી જરૂરી છે. કોરોના મહામારી વચ્ચે સરકાર દ્વારા ચૂંટણી યોજવાનું જાહેરનામું બહાર પડતા જ સુરત જિલ્લાની બારડોલી અને ચલથાણ સુગર ફેકટરી દ્વારા વ્યવસ્થાપક સમિતિની ચૂંટણી યોજવા માટેની કાર્યવાહી શરૂ કરવામાં આવી છે. પરંતુ ચલથાણ સુગર ફેકટરીના આશરે ૧૬ હજાર સભાસદો છે. અને બારડોલીના પપ૦૦ સભાસદો છે.જે બારડોલી, પલસાણા, કામરેજ, ચોર્યાસી, ઓલપાડ તાલુકાના ગામોમાં પથરાયેલા છે.ચૂંટણી સભાથી લઈ પ્રચાર પ્રસારમાં પણ સોશિયલ ડિસ્ટન્સિંગ કે અન્ય નિયમો જળવાય એમ નથી. આથી સભાસદ દ્વારા હાલના સમયમાં ચૂંટણી યોજવી યોગ્ય ન હોવાનું જણાવી પોતાનો વાંધો રજૂ કરવામાં આવ્યો છે.
તેમણે જિલ્લા કલેકટરને હાલની પરિસ્થિતિ જાહેર હિત અને સુખાકારીને ધ્યાનમાં લઈ બંને સુગર ફેકટરી દ્વારા ચૂંટણીની પરવાનગી માંગવામાં આવે તો તે પરવાનગી ન આપવા જણાવાયું છે.જો કે આ વાંધા અરજી બાદ વહેલી ચૂંટણી યોજવા મથામણ કરી રહેલા કેટલાક સહકારી અગ્રણીઓએ સરકાર પર દબાણ લાવીને પણ મંજૂરી મેળવવા માટે મન બનાવી લીધું છે.ત્યારે જિલ્લા કલેકટર જિલ્લાના લોકોની આરોગ્યની ચિંતા કરે છે કે પછી ગણ્યા ગાંઠયા સહકારી નેતાઓનો રાજકીય લાભ સંતોષે છે તે જોવું રહ્યું.બીજી તરફ ગુજરાત હાઈકોર્ટમાં સુગર ફેકટરીઓની ચૂંટણી સંદર્ભે એક સ્પેશિયલ સિવિલ એપ્લિકેશન દાખલ કરવામાં આવી છે.જેની સુનાવણી બાકી છે. આથી સદર એપ્લિકેશનમાં થનાર હુકમની સીધી અસર આવનારી સુગર ફેકટરીની ચૂંટણી પર પડે તેમ છે.અને જો એકવાર ચૂંટણી પ્રક્રિયા શરૂ થાય તો તે બાદ તેને અટકાવી શકાતી નથી.આથી આ વાંધો પણ અરજીમાં દર્શાવવામાં આવ્યો છે.
