નવી દિલ્હી, 12 જાન્યુઆરી 2023 ગુરૂવાર : બિહારના બક્સરમાં કેન્દ્રીય રાજ્યમંત્રી અશ્વિનીકુમાર ચૌબેને લોકોના ગુસ્સાનો સામનો કરવો પડ્યો.આ દરમિયાન તેમના કાફલા પર પથ્થરમારો પણ થયો.તેમના વિરૂદ્ધ સૂત્રોચ્ચાર પણ કરવામાં આવ્યા.આ દરમિયાન અશ્વિની ચૌબે મુર્દાબાદના નારા સંભળાયા હતા.
બક્સર-ચૌસાના બનારપુર પહોંચેલા કેન્દ્રીય મંત્રીને સુરક્ષાકર્મીઓના જાપ્તામાં સુરક્ષિત બહાર કાઢવામાં આવ્યા.
કેન્દ્રીય મંત્રી અશ્વિની ચૌબે થર્મલ પાવર પ્લાન્ટ પર આગની ઘટના બાદ ખેડૂતો સાથે વાતચીત કરવા બનારપુર ગામ પહોંચ્યા હતા.આ દરમિયાન તેમણે થોડીકવાર માટે ખેડૂતો સાથે વાતચીત પણ કરી.પરંતુ ત્યાં ઉમટેલી ભીડ ઉગ્ર બની ગઈ.ચૌબે બક્સરથી સાંસદ પણ છે.
શું છે વિવાદ?
બિહારના બક્સરમાં ખેડૂતોની જમીનની વળતરની માગને લઈને પ્રદર્શન કરી રહ્યાં છે.બક્સરના ચૌસા ગામમાં સતલજ જળ વિદ્યુત નિગમ (SJVN)ના થર્મલ પાવર પ્લાન્ટ માટે જમીનનું અધિગ્રહણ કરવામાં આવ્યું.ખેડૂતો તેનું યોગ્ય વળતર માગી રહ્યાં છે.પોલીસે આ પહેલાં મંગળવારે મોડી રાત્રે ખેડૂતોના ઘરમાં ઘૂસીને પ્રદર્શનકારીઓ પર પણ લાઠીચાર્જ પણ કર્યો હતો.
આરોપ છે કે પોલીસે ઘરમાં ઘૂસીને મહિલાઓ-પુરુષોની સાથે બાળકો પર બર્બરતાપૂર્વક લાકડીઓ ફટકારી હતી.લાઠીચાર્જની ઘટનાનો વીડિયો કિસાનના પરિવારે શેર કરીને પૂછ્યું કે ગુનેગારો સામે ઘૂંટણિયા ટેકવતી પોલીસે અમને આટલી ક્રૂરતાથી કેમ માર્યા.
લાઠીચાર્જ બાદ ભડકેલા ખેડૂતોઓએ ગાડીઓ ફુંકી
મંગળવારે રાત્રે ઘરોમાં ઘૂસીને પોલીસ દ્વારા લાઠીચાર્જ કર્યા બાદ ખેડૂતોમાં રોષ જોવા મળી રહ્યો છે.તેમણે ગાડીઓને ફુંકી દીધી હતી.ચૌસા પાવર પ્લાન્ટમાં પણ તોડફોડ કરી હતી. ખેડૂતોએ મોરચો ખોલી નાખ્યો અને આખી રાત બબાલ કરતા રહ્યાં.ખેડૂતોએ જોરદાર પ્રદર્શનો કર્યા અને બસો પણ સળગાવી દીધી.પોલીસની ગાડીઓ પણ ફુંકી નાખી.ખેડૂત છેલ્લાં બે મહિનાથી યોગ્ય વળતરની માગને લઈને આંદોલન કરી રહ્યાં છે.
