બીઆરટીએસ બસની ટક્કરથી બાઈક સવાર ગંભીરરીતે ઈજાગ્રસ્ત થયો

અમદાવાદ,તા.૨૨
અમદાવાદમાં સોલા ક્રોસ રોડ પાસે શનિવારે બપોરે આશરે ૧.૪૫ વાગ્યે બીઆરટીએસ બસ અને બાઈક વચ્ચે જબરજસ્ત ટક્કર સર્જાઈ હતી. બસ હેલમેટ સર્કલથી રાણીપ તરફ જઈ રહી હતી. ત્યારે આ અકસ્માત સર્જાયો હતો. બાઈક સવાર પુરુષ ગંભીર રીતે ઈજાગ્રસ્ત થયા છે. બાઈક પર પુરુષની સાથે એક છ વર્ષનું બાળક અને એક મહિલા પણ સવાર હતા. મહિલા અને બાળકને સામાન્ય ઈજા પહોંચી છે. તાત્કાલિક ધોરણે ૧૦૮ને બોલાવીને બાક સવારને હોસ્પિટલ ખસેડવામાં આવ્યો છે.
પૂર ઝડપે બસ ચલાવનાર ડ્રાઈવર અક્સમાત કરીને બસ મૂકીને ભાગી ગયો હતો. પરંતુ સોલા ક્રોસ રોડ પર બાઈક પર જતા કેટલાક યુવકોએ ડ્રાઈવરને પકડી લીધો હતો. દુર્ઘટના સમયે બાઈકની આગળ મોટું વાહન હોવાના કારણે બાઈક સવારને બરાબર દેખાતું નહતું એવામાં પાછળથી બીઆરટીએસ બસે પૂર ઝડપે આવીને બાઈકને ટક્કર મારી હતી.
બાઈકને ટક્કર માર્યા બાદ બસ ડ્રાઈવર ગભરાઈ ગયો હતો અને ગભરાહટમાં અકસ્માત બાદ પણ તે બસ ચલાવી રહ્યો હતો. ટક્કર વાગવાથી બાઈક પરથી નીચે પછડાયેલી મહિલા જો સમયસર ઉભી ન થઈ ગઈ હોત તો મહિલાનો હગ બસની નીચે આવી ગયો હોત. પ્રત્યક્ષદર્શીઓના જણાવ્યા અનુસાર મહિલાનો પગ માંડ-માંડ બચ્યો હતો
બીઆરટીએસ બસો અને તેના રૂટમાં વધી રહેલા અક્સમાતોને કારણે અમદાવાદના મોટા ભાગના બસ સ્ટોપ પર સેન્સરવાળા દરવાજા બનાવી દેવામાં આવ્યા છે કે જે ફક્ત બીઆરટીએસ બસ માટે જ ખૂલે છે. બીઆરટીએસની બસ જ્યારે બસ સ્ટોપ પર આવે અને તે ગેટની નજીક જાય ત્યારે સેન્સરથી તે દરવાજો ઓટોમેટિક ખૂલી જતો હોય છે. પરંતુ તેમ છતા પણ પૂર ઝડપે બસ ચલાવતા ડ્રાઈવર્સના કારણે અકસ્માતમાં ઘટાડો જોવા મળતો નથી.