બોટાદ જિ. સેવા સદનને પ્રતિબંધિત વિસ્તાર તરીકેનું જાહેરનામુ અમલી

બોટાદ : બોટાદ જિલ્લા સેવા સદનની ૨૦૦ મીટરની ત્રિજયાના વિસ્તારને પ્રતિબંધિત વિસ્તાર તરીકે જાહેર કરવા તેમજ જિલ્લાના તાલુકા સેવા સદન કે મામલતદાર કચેરીઓના વિસ્તાર માટે પ્રતિબંધિત ફરમાવતુ અધિક જિલ્લા મેજિસ્ટ્રેટએ જાહેરનામું પ્રસિધ્ધ કરાયુ છે.બોટાદ જિલ્લા સેવા સદનમાં જિલ્લાના તાલુકામાંથી મોટી સંખ્યામાં અરજદારો, જુદી જુદી સંસ્થાઓના પ્રતિનિધિઓ માંગણી તથા રજુઆતો માટે અવરજવર કરતા હોય છે.વિવિધ કચેરીઓ પાસેની માંગણી અન્વયે અસંતોષ થતા અરજદારો અને આ સંસ્થાઓના પ્રતિનિધિઓ કલેકટર કચેરીના પ્રાંગણમાં ઉપવાસ, રેલી, ધરણા કે આત્મવિલોપન કરતા હોય જેના કારણે તંગદિલીભર્યું વાતાવરણ સર્જાય અને આવા કિસ્સામાં અરજદારોની મોટી સંખ્યાને ધ્યાને લેતા કાયદો અને વ્યવસ્થાના પ્રશ્નો ઉપસ્થિત થતા હોય છે.જિલ્લા સેવા સદનમાં અરજદાર વ્યકિતગત રીતે કે મોટી સંખ્યામાં ભેગા થવાની સંભાવના હોય, સરકારી માલ મિલ્કતને કે વ્યકિતગત જાન માલને નુકશાન થવાના બનાવ બનવાની સંભાવના રહેલ હોય, સુલેહ શાંતિ જળવાઈ રહે અને કોઈ અનિચ્છનીય બનાવ ન બને તે હેતુસર બોટાદના અધિક જિલ્લા મેજિસ્ટ્રેટએ બોટાદ જિલ્લા સેવા સદનના ૨૦૦ મીટરની ત્રિજયાના વિસ્તારને આગામી તા.૩.૭ સુધી પ્રતિબંધિત વિસ્તાર જાહેર કરવા જાહેરનામું પ્રસિધ્ધ કર્યુ છે.તેમજ બોટાદ જિલ્લાના વિવિધ તાલુકા સેવા સદન,મામલતદાર કચેરીઓના વિસ્તારને તા.૩.૭ સુધી પ્રતિબંધિત વિસ્તાર જાહેર કરવા જાહેરનામું પ્રસિધ્ધ કર્યુ છે. આ બંને જાહેરનામાનો ભંગ અથવા ઉલ્લંઘન કરનાર કે મદદ કરનાર સજાને પાત્ર થશે.