માલપુર,તા.૨૫
માલપુરના વાત્રક નદી પરના બ્રીજ પર એક ટ્રેક્ટરને ટ્રકે ટક્કર મારતા મામેરું લઈને જતાં પરિવારના ૬ સભ્યોના મોત નિપજ્યા હતા. જ્યારે ૧૫થી વધારે ઘાયલ થયા હતા. મેઘરજના બેલ્યો ગામથી મામેરું લઈને જતા પરિવારના ટ્રેક્ટરમાંથી ૫ લોકો નદીમાં ખાબકતા ડૂબવાથી અને એકનું સારવાર દરમિયાન મોત થયું હતું. આ મૃત્યુ આંક વધવાની શક્યતા છે.
સોમવારે સાંજે મેઘરજના બેલ્યો ગામથી વીરાભાઇ મોંઘાભાઇ ચમાર અને તેમના ત્રણ ભાઈઓ માલપુરના મહીયાપુર ગામે તેમના બહેન લાડુબેન જેઠાભાઇ પરમારના ઘરે પુત્રના લગ્ન હોવાથી પરિવારજનો અને ગ્રામજનો ૩૨ જેટલા લોકો ટ્રેક્ટરમાં મામેરું લઈ નીકળ્યા હતા. માલપુર નજીક વાત્રક પુલ પરથી પસાર થતાં પાછળથી આવતા ડમ્પરે (ટ્રકે) ટક્કર મારતા ટ્રેક્ટર પુલની દીવાલ સાથે અથડાતા પુલની રેલિંગ તૂટતાં ટ્રેક્ટરમાં બેઠેલા૬ લોકો નદીમાં ખાબક્યા હતા. સદનસીબે ટ્રેક્ટર દીવાલને અથડાઈને અટકી ગયું હતું.
અકસ્માતના પગલે ટ્રેક્ટરમાં બેઠેલા લોકોની ચિચિયારીઓ ગુંજી ઉઠતા લોકોના ટોળેટોળા ઘટનાસ્થળે પહોંચ્યા હતા. ટ્રેક્ટરમાં બેઠેલા ૫ લોકો નદીમાં ખાબક્યા હોવાનું જણાવતા લોકોએ ૧૦૮ ઇમર્જન્સી અને માલપુર પોલીસને જાણ કરતા ઇજાગ્રસ્તોને સારવાર અર્થે ખસેડી નદીમાં ડૂબેલા લોકોની શોધખોળ હાથ ધરી હતી.
ફાયરબ્રિગેડ અને એનડીઆરએફની ટીમને સૌપ્રથમ હિમેશ પરમારની લાશ મળી આવ્યા પછી વધુ ત્રણ યુવકોના મૃતદેહ શોધવામાં ફાયરબ્રિગેડ એનડીઆરએફ અને સ્થાનિક તરવૈયાઓ સફળ રહ્યા હતા. તેમણે ૪ મૃતદેહને કાઢીને પીએમ માટે માલપુર સીએચસીમાં ખસેડયા હતા. બપોર પછી વધુ એક યુવકની લાશ મળી આવતા તમામના મૃતદેહને પીએમ માટે માલપુર સીએચસીમાં ખસેડી અન્ય મૃતદેહોની શોધખોળ હાથ ધરી હતી ગંભીર અકસ્માતમાં ઈજાગ્રસ્ત એક બાળકીનું પણ સારવાર દરમિયાન મોત નિપજતા અકસ્માતમાં કુલ ૬ થયો હતો.
ટ્રેક્ટરમાં બેઠેલા ૫ લોકો નદીમાં ખાબકતા અને ૨૨થી વધુ લોકો ઈજાગ્રસ્ત થતા હાઈવે પર ટ્રાફિકજામ થયો હતો. ઇજાગ્રસ્તોને સારવાર અર્થે ખસેડાતા સતત ૧૦૮ ઇમર્જન્સી એમ્બ્યુલન્સ અને અન્ય એમ્બ્યુલન્સના સાયરનના અવાજથી સમગ્ર વિસ્તાર ગુંજી ઉઠયો હતો. લગ્ન પ્રસંગ માતમમાં છવાતા પરિવારજનોએ આક્રંદ કરી મુકતા વાતાવરણમાં ગમગીની છવાઈ હતી. જિલ્લા પોલીસતંત્ર વહીવટી તંત્ર ફાયરબ્રિગેડ ટીમ અને સેવાભાવી લોકો આખી રાત વાત્રક નદી ખૂંદી નાંખી હતી. ઘટનાની ગંભીરતાના પગલે એનડીઆરએફની ટીમ પણ ગાંધીનગરથી દોડી આવી નદીમાં ડૂબેલા લોકોની શોધખોળ હાથધરી હતી.
બ્રિજ પર જાનૈયાઓનાં ટ્રેક્ટરને ટ્રકે ટક્કર મારતા લોકો નદીમાં ખાબક્યા, ૬નાં મોત
Leave a Comment