ભરૂચનો નામચીન બુટલેગર નયન ઉર્ફે બોબડાને બે વર્ષ બાદ પોલીસે ગણદેવીથી પકડ્યો

– વર્ષ 2010 થી લાખોના દારૂના અનેક ગુનામાં ભરૂચ જિલ્લા સહિત અન્ય મહાનગરોમાં લિસ્ટેડ છે નયન કાયસ્થ
– એ ડિવિઝન પોલીસે રિમાન્ડ મેળવવા હાથ ધરેલી તજવીજ

ભરૂચ સહીત પાંચ જીલ્લાના પોલીસ સ્ટેશનના પ્રોહીબીશન એક્ટમાં નાસ્તો ફરતો કુખ્યાત બુટલેગર નયન ઉર્ફે બોબડો 2 વર્ષ બાદ નવસારીના ગણદેવી ખાતેથી LCB ની પકડમાં આવ્યો છે.એ ડીવીઝન પોલીસે તેના રિમાન્ડ મેળવવાની તજવીજ હાથ ધરી છે.ભરૂચ એલસીબી પોલીસ મથકનો સ્ટાફ વિવિધ ગુનામાં વોન્ટેડ આરોપીઓને શોધી કાઢવામાં માટે અલગ અલગ ટીમો બનાવી પેટ્રોલીંગમાં હતો.દરમિયાન બાતમી મળી હતી કે ભરૂચ જીલ્લા 10 મળી કુલ 13 જેટલા પ્રોહીબીશન એક્ટ અને હાલોલ તાલુકા પોલીસ મથકના મારામારીના ગુનામાં વોન્ટેડ આરોપી નયન ઉર્ફે બોબડો કિશોર કાયસ્થ નવસારીના ગણદેવી ખાતે રોકાયેલ છે.જેવી બાતમીના આધારે ભરૂચ એલસીબી પોલીસે દરોડા પાડ્યા હતા.પોલીસે મૂળ ભરૂચના દાંડિયાબજાર અને હાલ ઝાડેશ્વર ચોકડી સ્વામીનારાયણ મંદિર સામે આવેલ રવીપુજન સોસાયટીમાં રહેતો કુખ્યાત બુટલેગર નયન ઉર્ફે બોબડો કિશોર કાયસ્થને ઝડપી પાડ્યો હતો.પોલીસે તેની પાસેથી બે ફોન અને રોકડા મળી કુલ 11 હજારથી વધુનો મુદ્દામાલ કબજે કર્યો હતો.

ભરૂચ એ ડીવીઝન પોલીસ મથકને હવાલે કર્યો હતો.ઝડપાયેલ કુખ્યાત બુટલેગર ભરૂચ એ ડીવીઝનના પાંચ પ્રોહીબીશન,ત્રણ સી ડીવીઝનના પ્રોહીબીશન,બે નબીપુર પોલીસ મથકના પ્રોહીબીશન તેમજ દહેજ મરીન,વાગરામાં મળી 13 ગુનાઓમાં વોન્ટેડ છે.જયારે તે અગાઉ રાજયની અલગ અલગ જેલોમાં 7 વાર પાસા કાપી ચુક્યો છે અને 2010 થી અત્યાર સુધી ભરૂચ,ગોધરા,વડોદરા ગ્રામ્ય,નવસારી,વલસાડ જીલ્લામાં પ્રોહીબીશન એક્ટના ગુનામાં ઝડપાયેલ છે.જયારે મારામારીના 5 ગુનામાં પણ તેની ધરપકડ કરવામાં આવી હોવાનું જાણવા મળ્યું છે.હાલ પોલીસે તેની અટકાયત કરી તેના રિમાન્ડ મેળવવાની તજવીજ હાથ ધરી છે.છેલ્લા બે વર્ષથી નામચીન નયન બોબડો વોન્ટેડ હતો.