– અંતિમ દિવસે સાતે’ક લાખ લોકોની ભીડથી તળેટીમાં પગ મુકવાની જગ્યા ન રહી
– રવેડીમાં દિગમ્બર સાધુ સંતોના કરતબ નિહાળી સૌ કોઈ મંત્રમુગ્ધ,રાત્રે યોજાનાર રવેડીના દર્શન માટે લોકો બપોરથી જ તડકામાં બેરીકેડ આસપાસ ગોઠવાઈ ગયા
જૂનાગઢનાં મહાશિવરાત્રી મેળાના અંતિમ દિવસે અંદાજે સાત લાખ લોકો ઉમટી પડયા હતા.આજે બપોર બાદ બેરીકેડ બંધાયા ત્યાં જ લોકો તડકામાં જ બેસી ગયા હતા.અને રાત્રીના ભવનાથ તળેટી ક્ષેત્રમાં સાધુ સંતોની પરંપરાગત રીતે યોજાઈ હતી અને ત્યારબાદ રવેડી ભવનાથ મંદિરે પહોંચી હતી.જ્યાં સાધુ સંતોએ મૃગીકુંડમાં સ્નાન કર્યું હતું અને હરહર મહાદેવનો નાદ ગુંજી ઉઠયો હતો અને સાધુ સંતોના સ્નાન સાથે પાંચ દિવસથી ચાલતો મહાશિવરાત્રી મેળો પૂર્ણ થયો હતો.અને મોડીરાત સુધી લોકોનો પ્રવાહ તળેટીથી શહેર તરફ વહેતો રહ્યો હતો.
જૂનાગઢનાં ભવનાથમાં ચાલી રહેલા મહાશિવરાત્રી મેળાના અંતિમ દિવસે આજે પણ સવારથી ભાવિકોનો અવિરત પ્રવાહ તળેટી તરફ વહેતો રહ્યો હતો.લોકોએ ભવનાથ તળેટીમાં પહોંચી મહાદેવના મંદિરે દર્શન કરી અન્નક્ષેત્રમાં ભોજન પ્રસાદ તેમજ મહાશિવરાત્રિ નિમિતે જેણે ઉપવાસ કર્યો હતો.તેઓએ ફરાળ ગ્રહણ કર્યું હતું.આજે શિવરાત્રી હોવાથી ભવનાથ મંદિરે મહાદેવને વિશેષ શણગાર કરવામા આવ્યો હતો.આ ઉપરાંત આશ્રમો તેમજ જગ્યાઓમાં ભાંગની પ્રસાદી આપવામાં આવી હતી.
આજે ભારે ભીડના લીધે સવારથી ભરડાવાવ ખાતેથી જ વાહનોને પ્રવેશબંધી કરી દેવામાં આવી હતી.અને લોકો ગિરનાર દરવાજાથી પગપાળા તળેટીમાં પહોંચ્યા હતા.બપોરે રવેદીના રૂટ પર બેરીકેડ બાંધવામાં આવ્યા હતા.ત્યારે રવેડી નિહાળવા લોકો તડકામાં બેરીકેડ આસપાસ બેસી ગયા હતા.અને કલાકો સુધી એક જ સ્થળે બેસી રહ્યા હતા.
રાત્રીના શ્રી પંચ દશનામ જુના અખાડા ખાતેથી રવેડીનો પ્રારંભ થયો હતો.જેમાં જુના અખાડાના આરાધ્યદેવ દત્તાત્રેય ભગવાન,આવાહન અખાડાના શ્રી ગણેશજી અને અગ્નિ અખાડાના આરાધ્યદેવ શ્રી ગાયત્રીમાતાજીની પાલખી જોડાઈ હતી.આ ઉપરાંત મહામંડલેશ્વરો,તેમજ અન્ય અખાડાના સાધુ સંતો તેમજ દિગમ્બર સાધુઓ રવેડીમાં જોડાયા હતા.વાજતે ગાજતે યોજાયેલી રવેડીમાં દિગમ્બર સાધુઓએ લાઠીદાવ,અંગકસરત તેમજ તલવારબાજી જેવા કરતબ રજૂ કર્યા હતા.જેને નિહાળી સૌ કોઈ મંત્રમુગ્ધ બન્યા હતા.રવેડી જુના અખાડા ખાતેથી શરૂ થઈ મંગલનાથજી આશ્રમ પાસે થઈ દતચોક,અને ત્યાથી ઇન્દ્રભારતીબાપુના ગેટ પાસે થઈને પાછળના રોડ થઈ પરત ભારતી આશ્રમ પાસે થઈને મોદી રાત્રે ભવનાથ મંદિરે પહોંચી હતી.અને ત્યાં પ્રથમ અખાડાના આરાધ્યદેવોને મૃગીકુંડમાં સ્નાન કરાવવામાં આવ્યું હતું.બાદમાં સાધુ સંતોએ મૃગીમુંડમાં સ્નાન કર્યું હતું.અને ભવનાથ મહાદેવની મહાઆરતી યોજાઈ હતી.આ સાથે પાંચ દિવસીય મહાશિવરાત્રી મેળો સંપન્ન થયો હતો.મોડી રાત્રીના મેળો સંપન્ન થયો હતો.
રાતભર લોકોનો પ્રવાહ જૂનાગઢ શહેર તરફ વહેતો રહયો
મહાશિવરાત્રી મેળો સંપન્ન થતા રાતભર ભવનાથ તળેટીથી જૂનાગઢ શહેર તરફ લોકોનો પ્રવાહ વહેતો રહ્યો હતો.અને બસ સ્ટેન્ડ,રેલવે સ્ટેશન,કાળવા ચોક,મજેવડી દરવાજા સહિતના સ્થળોએ તેમજ રોડ પર મેળાનો ટ્રાફીક રહયો હતો.
અખાડાના પાંચમા માળેથી પટકાતા પુનાના યુવાનનું મોત
પૂનાના વિશાલભાઈ અરૂણભાઈ સકપાલ (ઉ.વ.૩૩) અને તેના એક સબંધી મહાશિવરાત્રી મેળામાં આવ્યા હતા.આજે બપોરે વિશાલભાઈ ભવનાથ મંદિર પાછળ આવેલા અખાડાના પાંચમાં માળે હતા.ત્યારે અકસ્માતે પડી જતા તેને ગંભીર ઇજા થઇ હતી અને૧૦૮માં સિવિલ હોસ્પિટલમાં ખસેડાયા હતા.જ્યાં ફરજ પરના તબીબે તેને મૃત જાહેર કરતઆ ગમગીની વ્યાપી ગઈ હતી.આ અંગે ભવનાથ પોલીસે વધુ કાર્યવાહી હાથ ધરી છે.
ખારવા સમાજમાં ગેસ સિલિન્ડર લીક થતા આગ,ફાયર બ્રિગેડે બૂઝાવી
મેળા દરમ્યાન ભવનાથમાં આવેલા ખારવા સમાજ ખાતે રસોઈ દરમ્યાન ગેસ સિલિન્ડર લીક થતા આગ લાગી હતી.આ અંગે જાણ થતાં મનપાના ફાયર વિભાગે તાકીદે જઈ આગને બુઝાવી હતી.
રાજુલા,વેરાવળ,ચિતલ સહિતના શહેરોમાં શિવ શોભાયાત્રા
હર હર મહાદેવ; સોમનાથ મંદિર સહિતના શિવાલયોમાં ભાવિકોની ભીડ
મહાશિવરાત્રીના પર્વની દિવ્ય ઉજવણી; જલાભિષેક,બિલ્વાભિષેક,દુગ્ધાભિષેક સાથે શિવ મહિમ્ન સ્તૂતિના નાદથી ભક્તિપર્વની ગંગા વહી
મહાશિવરાત્રીનું શ્રદ્ધાપર્વ સોમનાથ મંદિર સહિત સમગ્ર સોરઠ પંથકમાં ભક્તિભાવ પૂર્ણ બની રહ્યું હતું.સોમનાથ મંદિરે પારંપરીક પાધનો ભગવાન ભોળાનાથને શ્રૂંગાર કરવામાં આવ્યો હતો.હર હર મહાદેવના દિવ્ય નાદ સાથે સોમનાથ દાદાની દિવ્ય પાલખીયાત્રા શહેરના રાજમાર્ગો પર નીકળી હતી.એ જ રીતે રાજુલા,ચિતલ,વેરાવળમાં પણ ભવ્ય શિવ શોભાયાત્રા નીકળી હતી.જસદણ નજીક આવેલા પૌરાણિક ઘેલા સોમનાથ મહાદેવના દિવસ દરમિયાન સંખ્યાબંધ શ્રદ્ધાળુ ભાવિકોની ભીડ રહી હતી.શિવ મંદિરોમાં ચારે પ્રહરની દિવ્ય શિવ પુજા સાથે વેદ મંત્રોથી આરાધાનાથી વાતાવરણ શિવમય બની રહ્યું હતું.
વિશ્વ પ્રસિધ્ધ સોમનાથ મહાદેવ મંદિરે મહા શિવરાત્રિનાં પર્વની ભવભક્તિસભર ઉજવણી થઈ હતી.દિવસ દરમિયાન એકલાખથી વધુ શિવભક્તોએ ભગવાન ભોળાનાથને શિશ નમાવ્યું હતું.વેરાવળ સુત્રાપાડા સહિતના વિસ્તારોમાંથી હજારો શ્રધ્ધાળુ ભાવિકો પગપાળા અહી આવી પહોંચ્યા હતાં. ૧૫૧ કિલો વિવિધ પુષ્પોના શૃંગાર યોજાયા હતાં તેમજ દિવસ દરમિયાન ૪૪ ધજા ચડાવવામાં આવી હતી.વેરાવળના ભૈરવનાથ ચોકમાંથી ભવ્ય શોભાયાત્રા નીકલી હતી.આ શોભાયાત્રામાં સંખ્યાબંધ શિવભક્તો જોડાયા હતાં.સોમનાથ મહાદેવ મંદિર પરીસરમાં પાલખી યાત્રી આવી પહોંચતા હર હર મહાદેવના નાદ સર્વત્ર ગુંજી ઉઠયા હતાં.શિવરાત્રિ મહોત્સવ નિમિતે વહેલી સવારે ૪ વાગ્યે મંદિરના દ્વાર ખુલ્યા બાદ દિવસ દરમિયાન પ્રાતઃ આરતી મહામૃત્યુંજય જળયજ્ઞાનું હોમાત્મક લઘુરૂદ્ર,શોભાયાત્રા, મધ્યાહ્ન મહાપુજા, મધ્યાહ્ન આરતી,જયોત પુજન,સાંય આરતી,રાત્રિ દરમિયાન જુદા જુદા પ્રહરની પુજામાં હજારો ભાવિકો જોડાયા હતાં.સોમનાથ મંદિર ઉપરાંત ત્રિવેણી સંગમ,ગીતા મંદિર,મહાપ્રભુજીની બેઠક,ભીડભંજન મહાદેવ, ભાલકાતિર્થ,બિલેશ્વર મહાદેવ સહિતના મંદિરોમાં પણ શ્રધ્ધાળુ ભાવિકોની ભીડ જોવા મળી હતી. કાયદો વ્યવસ્થા જાળવવા માટે પોલીસતંત્ર ખડે પગે રહ્યું હતું.જૂદી જૂદી સંસ્થાઓ દ્વારા આયોજિત ભંડારાનો લાભ અનેક લોકોએ લીધો હતો.
અમરેલી શહેરમાં નાગનાથ મહાદેવ મંદિર ખાતે મહાશિવરાત્રિ પર્વની ભક્તિસભર ઉજવણી થઈ હતી.દવ્ય શોભાયાત્રા યોજાઈ હતી.ચલાલામાં બ્રહ્માકૂમારીઝ સંસ્થા દ્વારા શિવ શોભાયાત્રા યોજાઈ હતી.અમરેલી જિલ્લાનાં પૌરાણિક શિવમંદિરોએ દર્શનનો લાભ કેન્દ્રીય મંત્રી દર્શનનો લાભ કેન્દ્રીય મંત્ર પુરૂષોતમ રૂપાલાએ લીધો હતો. તાલાલાના બોરવાવગીર નજીક લુણમુક્તેશ્વર મહાદેવ મંદિરે મહા શિવરાત્રિ પર્વની ભક્તિસભર ઉજવણી થઈ હતી.
રાજુલા, વેરાવળ અને ચિતલમાં પણ શોભાયાત્રા યોજાઈ હતી.વડીયામાં શિવમંદિરોમાં દીપ માળા આરતી સહિતના ધાર્મિક કાર્યક્રમો યોજાયા હતાં.એ જ રીતે પ્રાંચી ખાતે દશનામ ગોસ્વામી સમાજ દ્વારા શિવશોભાયાત્રાનું આયોજન થયું હતું.ડોળાસાના સંત વીરાભગતની જગ્યામાં મહાશિવરાત્રિ પર્વની ભક્તિસભર ઉજવણી થઈ હતી.
દિવઃ અહીં મહાશિવરાત્રિ પર્વ નિમિત્તે દિવસ દરમિયાન ગંગેશ્વર મહાદેવ,દ્વારિદ્રભંજન મહાદેવ મંદિર,હાટકેશ્વર સહિતના શિવાલયોમાં વિવિધ ધામિક્ કાર્યક્રમો યોજાયા હતા. ખ્યાબંધ શ્રધ્ધાળુ ભાવિકોએ દર્શનનો લાભ લીધો હતો.
જસદણઃ અહીંના ઘેલા સોમનાથ મંદિરે મહાશિવરાત્રિ પર્વ નિમિત્તે દર્શનાર્થીઓ માટે મંદિર ૨૪ કલાક ખુલ્લું રહ્યુ ંહતું. દિવસ દરમિયાન વિવિધ ધાર્મિક કાર્યક્રમો યોજાયા હતા.અંદાજે આઠ હજારથી વધુ ભાવિકોએ પ્રસાદનો લાભ લીધો હતો.
