ડેડીયાપાડા : ગુજરાત વિધાનસભાની સામાન્ય ચૂંટણીના પ્રથમ તબક્કાની ચૂંટણીનો પ્રચાર અંતિમ તબક્કે પહોંચ્યો છે,ત્યારે તમામ પક્ષ અને ઉમેદવારો મતદારોને આકર્ષવા નિતનવા ઉપાયો કરી રહ્યાં છે.રાષ્ટ્રીય કક્ષાના રાજકીય નેતાઓએ હાજરી આપ્યા બાદ હવે નર્મદા જિલ્લામાં ક્રિકેટર રવિન્દ્ર જાડેજાએ આજે ડેડીયાપાડાના ભાજપ ઉમેદવાર હિતેશ વસાવાના સમર્થનમાં રોડ શો યોજી ભાજપ ઉમેદવારને જીતાડવા અપીલ કરી હતી.
રાજ્યમાં વિધાનસભાની ચૂંટણીના ગણતરીના દિવસો પહેલા હવે દરેક પક્ષ મતદારોને રીઝવવામાં લાગ્યા છે.ત્યારે ભાજપના પોસ્ટર બોય અને જામનગર ઉત્તર બેઠકના ભાજપના ઉમેદવાર રિવાબાના પતિ અને ભારતીય ક્રિકેટ ટીમના ઓલરાઉન્ડર રવિન્દ્ર જાડેજાએ આજે ડેડીયાપાડામાં રોડ શો કર્યો હતો.ડેડીયાપાડામાં APMC માર્કેટથી શરૂ થયેલો રોડ શો ભગવાન બિરસા મુંડાની પ્રતિમા સુધી યોજાયો હતો.આ તબક્કે પ્રદેશ ભાજપ મહામંત્રી પ્રદીપસિંહ વાઘેલા અને સ્ટાર પ્રચારક એવા સાંસદ મનસુખ વસાવા પણ જોડાયા હતા.રોડ શો સમાપ્તિ સમયે ક્રિકેટર રવિન્દ્ર જાડેજાએ ઉપસ્થિત વિશાળ જનમેદનીને સંબોધન કરીને ભાજપ ઉમેદવાર ને જીતાડવા અપીલ કરી હતી.સાથે જ તેમણે મીડિયા સાથેની વાતચીતમાં કહ્યું હતું કે- હું માત્ર પત્ની માટે જ નહીં ભાજપ માટે પણ પ્રચાર કરીશ.આ સાથે સભા સંબોધતા ભાજપના ઉમેદવારને વિજયી બનાવવા માટે અપીલ કરી હતી.આ પહેલાં રવિન્દ્ર જાડેજાએ દ્વારકાના પબુભા માટે પણ રોડ શો કર્યો હતો.
