રાજકોટ શહેરમાં ભાજપનાં આગેવાનની દાદાગીરીની ઘટના સામે આવી છે.જેમાં વોર્ડ નં. 6ના ભાજપનાં નગરસેવિકાનાં પતિ ઘનશ્યામ કુગાશીયાએ પોતે જે સોસાયટીનો પ્રમુખ છે તે સોસાયટીમાં રહેતા વ્યક્તિએ મકાન વેંચતા તેના NOCનાં બદલે રૂ. 1 લાખ માંગીને મકાન માલિકને બેફામ ગાળો ભાંડી હતી અને હોલમાં રૂ.20 હજારના 10 પંખા નખાવી દેવા પડશે તેવુ કહીને ધમકી પણ આપી હતી.આ ઘટનાની ઓડિયોક્લિપ પણ સામે આવી છે.મહાશય ભાજપનાં વોર્ડ પ્રમુખ પણ હોવાથી મામલો ઉચ્ચ કક્ષાએ પહોંચ્યો છે.જોકે કુગશીયાએ પોતાના પર લાગેલા આરોપો ફગાવી દીધા છે અને કહ્યું છે કે, મેં માત્ર મકાન વેંચાણની દલાલીનાં રૂપિયા માંગ્યા હતા.જે આપવા નહીં હોવાથી બદનામ કરવાનો પ્રયાસ કરાઈ રહ્યો છે.
જાણવા મળતી વિગત મુજબ, સંતકબીર રોડ પરની ભોજલરામ સોસાયટીનાં દીપક જયંતીભાઇ ટુડિયાએ પોતાનું મકાન રૂ.45 લાખમાં વેચવાનો સોદો કર્યો હતો. દીપક ટુડિયાએ જણાવ્યું હતું કે, ખરીદનારે સોસાયટીનું NOC માંગતા તેમણે સોસાયટીનાં પ્રમુખ ઘનશ્યામ હમીરભાઇ કુગશીયાને રજૂઆત કરી હતી.તે ભાજપ વોર્ડ પ્રમુખ અને વોર્ડનાં કોર્પોરેટર મંજુબેનનાં પતિ છે.પોતે NOC માંગતા કુંગશીયાએ મને પૂછ્યા વગર મકાન કેમ વેચ્યું? તેમ કહી NOC માટે દલાલીના 2 ટકા એટલે કે રૂ. 90 હજાર અને સોસાયટીના હોલમાં 10 પંખા નખાવી દેવાના રૂ.20 હજાર મળી કુલ રૂ.1.10 લાખની માંગ કરી હતી.જેને લઈને પોતે બીકનાં માર્યા રૂપિયા આપવાની હા પાડી હતી.
દરમિયાન કુગશીયાએ પોતાની બીકનો લાભ લઈને આ રકમ દલાલી પેટે આપવાની છે તેવું લખાણ પણ કરાવી લીધું હતું.બાદમાં સોસાયટીનું NOC મળતાં મકાન તો વેચાઇ ગયું હતું.પોતે રૂપિયા નહીં ચૂકવતા ઘનશ્યામે પઠાણી ઉઘરાણી શરૂ કરી હતી. જેમાં પોતાને અનેક ફોન કરી રૂપિયાની માંગ કરવાની સાથે જો પૈસા નહીં મળે તો જોઇ લેવાની પણ ધમકી આપી હતી.દીપક અને મહિલા નગર સેવિકાનાં પતિ ઘનશ્યામ વચ્ચેની વાતચીતની ઓડિયોક્લિપ પણ સામે આવી છે.આ ઓડિયોક્લિપમાં પણ ઘનશ્યામ દીપકને બેફામ ગાળો ભાંડતો હોવાનું સ્પષ્ટ સાંભળી શકાય છે.જો કે આ ઓડિયોક્લિપમાં કેટલી સચ્ચાઈ છે તે પોલીસ તપાસ બાદ જ જાણી શકાશે.
બીજી તરફ પોતાના ઉપર લાગેલા આ તમામ આરોપો ફગાવતા ઘનશ્યામે જણાવ્યું હતું કે, દીપક ટુડિયાએ મકાન વેચવાનું હોવાથી તે મારી પાસે આવ્યો હતો.ત્યારે તેણે આ મકાન તેના સંબંધીને જ લેવું હોવાનું જણાવ્યું હતું.ત્યારબાદ મકાનનો સોદો થયો ત્યાં સુધી મને જાણ કરવામાં આવી નહોતી.છતાં પોતે તો માત્ર સોસાયટીનાં નિયમ મુજબ મકાનની દલાલીનાં રૂપિયા માંગ્યા હતા.પરંતુ દીપકે આ રકમ આપવી ન હોવાથી ખોટી રીતે મને બદનામ કરવાનો પ્રયાસ કરી રહ્યો છે.
