સુરતઃભાજપ સરકારના બેટી બચાવોના નારા વચ્ચે ખુદ ભાજપના જ કાર્યકરો વોટ્સએપ ગ્રુપમાં અશ્લીલ વીડિયો મુકી રહ્યા હોય એવી ઘટનાઓ છાશવારે સામે આવી રહી છે. શુક્રવારે વોર્ડ નંબર-18 ભાજપ પરિવાર નામના ગ્રુપમાં વોર્ડ નંબર 18ના ભાજપ મહામંત્રી કેતન માટલીવાલાએ અશ્લીલ વીડિયો મુકી દેતાં વિવાદ થયો હતો. આ અગાઉ 9 ફેબ્રુઆરીના રોજ વોર્ડ નંબર 24ના કાર્યકર કિશોર સોલંકીએ પણ ભાજપ લિંબાયત ગ્રુપમાં વીડિયો મુકતા વિવાદ થયો હતો.
ભાજપ મહામંત્રીની ટીકા થઈ
સમાજમાં અને યુવાઓમાં વિકૃતિ ફેલાવનાર પોર્ન સાઈટો પર પ્રતિબંધ માટે કેન્દ્રની ભાજપા સરકાર સતત પ્રયત્નશીલ છે ત્યારે આવી હજારો પોર્ન વેબસાઈટો અને વોટ્સએપ ગ્રુપમાંથી વીડિયો ડાઉનલોડ કરીને ફોરવર્ડ કરી વિકૃતિ ફેલાવવામાં ભાજપના જ કાર્યકરો સામે આવી રહ્યાં છે. શહેરના વોર્ડ નંબર 18ના ભાજપના મહામંત્રી કેતન માટલીવાલાએ શુક્રવારે એક પોસ્ટ ફોરવર્ડ કરી હતી, જેમાં કેતન માટલીવાલાએ જોયા વિચાર્યા વગર જ અન્ય વીડિયોની સાથે અશ્લીલ વીડિયો અને ફોટો પણ ફોરવર્ડ કર્યા હતા. અભદ્ર પોસ્ટને કારણે ગ્રુપ મેમ્બરોમાં પણ રોષ જોવા મળ્યો હતો. રોષે ભરાયેલા એક મેમ્બરે આવી વિકૃત માનસિકતા ધરાવતા વ્યકિતને પાઠ ભણાવવા માટે સ્ક્રીનશોટ પાડી ફોટો વાયરલ કર્યા હતા. શહેરીજનોમાં પણ ભાજપના વોર્ડ નંબર 18ના મહામંત્રી સામે ખાસ્સી ટીકાઓ થઈ હતી.
ગ્રુપમાં ધારસભ્ય અને સાંસદ પણ છે
વોર્ડ નંબર 18 ભાજપ પરિવાર નામના ગ્રુપમાં જે વીડિયો ફોરવર્ડ કરાયા છે. તે ગ્રુપમાં સાંસદ સી.આર પાટીલ અને ધારાસભ્ય સંગીતા પાટીલ પણ છે. ફોરવર્ડ થયેલા વિકૃત વીડિયોને કારણે ગ્રુપની મહિલાઓ પણ શરમમાં મુકાઈ હતી.
