– આ બેઠકમાં પ્રદેશ ઉપાધ્યક્ષ ભરત બોધરા પણ હાજર રહ્યા હતા
રાજકોટમાં ભાજપનાં પ્રદેશ અધ્યક્ષ પાટીલ સૌરાષ્ટ્રની ઓચિંતી મુલાકાતે આવી પહોંચ્યા હતા.દ્વારકા બાદ તેમણે રાજકોટનાં ‘કમલમ’ કાર્યાલય ખાતે એક બેઠક યોજી હતી.જેમાં રાજકોટ શહેરની 4 અને જિલ્લાની 4 બેઠકોને લઈને ચર્ચા કરવામાં આવી હતી.રાજકોટ પૂર્વ,રાજકોટ ગ્રામ્ય,જસદણ અને ધોરાજી બેઠક પર ભાજપ માટે ચિંતાજનક વાતાવરણ હોવાની ચર્ચાઓ ઉઠી રહી છે.સાથે જ ભાજપમાં આંતરિક જૂથવાદ ચાલતો હોવાથી તેનું નિરાકરણ લાવવા પાટીલ અહીં આવ્યા હોવાની વાતો વહેતી થઈ હતી.જોકે પાટીલે ચૂંટણી પૂર્વની આ સામાન્ય બેઠક હોવાની અને કેટલી વધુ લીડ મેળવી શકાય તે માટે ચર્ચા થઈ હોવાનું કહ્યું હતું.
જાણવા મળતી વિગત અનુસાર, પ્રથમ તબક્કાના મતદાનને માત્ર બે દિવસ બાકી છે.ત્યારે ભાજપ પ્રદેશ પ્રમુખ સી.આર.પાટીલ આજે સવારે હેલીકોપ્ટર દ્વારા દ્વારકા આવી પહોચ્યા હતા.દોઢેક કલાક સુધી પક્ષની મીટીંગ લીધી હતી.અને ઉમેદવારોને પણ મળ્યા હતા.બાદમાં તેઓ રાજકોટ કમલમ કાર્યાલય ખાતે આવી પહોંચ્યા હતા.અહીં એક ખાસ બેઠક યોજાઇ હતી.આ બેઠકમાં પ્રદેશ ઉપાધ્યક્ષ ભરત બોધરા પણ હાજર રહ્યા હતા.ભરત બોધરાને રાજકોટ શહેરની 4 અને જસદણ બેઠક પર ચૂંટણી ઇન્ચાર્જની જવાબદારીઓ અપાઈ હોવાથી પાટીલે તેમની સાથે ખાસ ચર્ચા કરી છે.આ સાથે જ તમામ વિધાનસભાના ઇન્ચાર્જ – પ્રમુખો અને મહામંત્રીઓ સહિત રાજકોટ સાંસદ મોહનભાઈ કુંડારીયા અને રાજ્યસભાનાં સાંસદ રામભાઈ મોકરિયા પણ હાજર રહ્યા હતા.
આ અંગે પાટીલે મીડિયા સાથેની વાતચીતમાં જણાવ્યું હતું કે, મતદાનને માત્ર બે દિવસ બાકી રહ્યા છે.ત્યારે પ્રથમ તબક્કાનું મતદાન થવાનું છે તેવા સ્થળો ઉપર મુલાકાત લઈને તૈયારીઓની સમીક્ષા કરવામાં આવી રહી છે.જે અંતર્ગત દ્વારકા બાદ હું અહીં આવ્યો છું.રાજકોટનાં લોકોએ વર્ષોથી ભાજપનો સાથ આપ્યો છે. અને આગામી ચૂંટણીમાં પણ અહીં તમામ બેઠકો ઉપર ભાજપની જીત નિશ્ચિત છે.પરંતુ વધુમાં વધુ લીડ મેળવવા માટે શુ-શુ કરી શકાય તેની ચર્ચા બેઠકમાં કરવામાં આવી છે.આ તકે ભાજપમાં કોઈ જૂથવાદ હોવાનો તેમજ કોઈપણ બેઠકમાં મુશ્કેલીઓ હોવાનો તેમણે સ્પષ્ટ ઈન્કાર કર્યો હતો.જ્યારે અનિરુદ્ધસિંહ જાડેજાએ કોંગ્રેસને સમર્થન જાહેર કર્યા અંગે જવાબ આપવાનું ટાળ્યું હતું.
ઉલ્લેખનીય છે કે, દ્વારકામાં ખૂબ જ રસાકસી ભર્યો જંગ છે.અને નજીવી સરસાઈથી હાર જીત થવાની સંભાવના હોવાથી પાટીલ વ્યૂહરચનાને આખરી ઓપ આપવા અને કોઈ અસંતોષ હોય તો ડામી દેવા દ્વારકા આવ્યાનું મનાય છે.આ ઉપરાંત પાટીલ રાજકોટ પણ આવ્યા હતા.અને ગ્રામ્યવિસ્તારના ભાજપ કાર્યકરો તેમજ આગેવાનો સાથે બેઠક યોજી હતી.રાજકોટ જિલ્લાની 8 બેઠકો પૈકી રાજકોટ ગ્રામ્ય,જસદણ અને ધોરાજી બેઠક પર ભાજપ માટે ચિંતાજનક વાતાવરણ હોવાને કારણે પાટીલે આ મેરેથોન બેઠક યોજી હોવાની ચર્ચાઓ ચાલી રહી છે.
