ભારતીય જનતા પાર્ટીએ આગામી વર્ષે યોજાનારી પાંચ રાજ્યોની વિધાનસભાની ચૂંટણીની તૈયારીઓ શરૂ કરી દીધી છે.પાર્ટીએ બુધવારે પાંચ ચૂંટણી રાજ્યો માટે પોતાના પ્રભારીઓની જાહેરાત કરી હતી.ઉત્તર પ્રદેશ વિધાનસભા ચૂંટણી માટે કેન્દ્રીય મંત્રી ધર્મેન્દ્ર પ્રધાનને પ્રભારી નિયુક્ત કરવામાં આવ્યા છે.
કેન્દ્રીય મંત્રી ગજેન્દ્ર શેખાવત પંજાબના પ્રભારી,ધર્મેન્દ્ર પ્રધાનને યુપીના પ્રભારી બનાવાયા.ભૂપેન્દ્ર યાદવને મણિપુરના પ્રભારી બનાવાયા.દેવેન્દ્ર ફડણવીસને ગોવાના પ્રભારી બનાવાયા છે.પ્રહલાદ જોશી ઉત્તરાખંડના ચૂંટણી પ્રભારી બનાવાયા છે.કેન્દ્રીય મંત્રી અનુરાગ ઠાકુર,અર્જુન રામ મેઘવાલ,સરોજ પાંડે,શોભા કરંદલાજે,કેપ્ટન અભિમન્યુ,અન્નપૂર્ણા દેવી અને વિવેક ઠાકુરને યુપી ચૂંટણી માટે સહ-પ્રભારી બનાવવામાં આવ્યા છે.
ઉત્તરાખંડ,પંજાબ,ગોવા અને મણિપુરની જવાબદારી આમને સોપાઇ
ઉત્તરાખંડ માટે પાર્ટીએ કેન્દ્રીય મંત્રી પ્રહલાદ જોશીને જવાબદારી સોંપી છે,સાથે લોકેટ ચેટરજી અને સરદાર આરપી સિંહને પણ સહ-પ્રભારી બનાવવામાં આવ્યા છે.હરદીપ પુરી,મીનાક્ષી લેખી,વિનોદ ચાવડાને કેન્દ્રીય મંત્રી ગજેન્દ્રસિંહ શેખાવતની સાથે પંજાબ ચૂંટણી માટે પ્રભારી નિયુક્ત કરવામાં આવ્યા છે.મહારાષ્ટ્રના પૂર્વ મુખ્યમંત્રી દેવેન્દ્ર ફડણવીસને ગોવાની ચૂંટણીની જવાબદારી સોંપવામાં આવી છે.આ સાથે જ મણિપુરની વિધાનસભા ચૂંટણી માટે કેન્દ્રીય મંત્રી ભૂપેન્દ્ર યાદવને પ્રભારી બનાવવામાં આવ્યા છે.
ચાર રાજ્યોમાં ભાજપની સરકાર
વર્ષ 2022 માં ઉત્તર પ્રદેશ,પંજાબ,ઉત્તરાખંડ,ગોવા,મણિપુરમાં વિધાનસભાની ચૂંટણીઓ યોજાવાની છે.આ સ્થળોએ માર્ચ-એપ્રિલની વચ્ચે ચૂંટણી થઈ શકે છે,આથી તમામ રાજકીય પક્ષોએ અત્યારથી જ તૈયારીઓ કરી લીધી છે.અત્યારે આ પાંચ રાજ્યોમાંથી ચારમાં ભારતીય જનતા પાર્ટીની સરકાર છે,જ્યારે પંજાબમાં કોંગ્રેસની સરકાર છે.આ પાંચ રાજ્યોની વિધાનસભાની ચૂંટણીને મિશન 2024 ની સેમિફાઇનલ તરીકે પણ ગણવામાં આવી રહી છે.
