15મી માર્ચ, 2022 મંગળવાર નવી દિલ્હી : રશિયા અને યુક્રેન વચ્ચેના યુદ્ધને 20 દિવસ વીતી ગયા છે અને બંને દેશો વચ્ચે સંઘર્ષ અટકવાનું નામ નથી લઈ રહ્યું.આ યુદ્ધથી બંને દેશોને ભારે નુકસાન થઈ રહ્યું છે અને તેની અસર વિશ્વના અન્ય દેશો પર પણ સ્પષ્ટ દેખાઈ રહી છે.દરમિયાન ભારતની સૌથી મોટી ધિરાણકર્તા સ્ટેટ બેંક ઓફ ઈન્ડિયા (SBI)એ યુક્રેન સંકટને કારણે ભારતના જીડીપી વૃદ્ધિનું અનુમાન ઘટાડીને 7.8 ટકા કર્યું છે. અગાઉ એસબીઆઈએ જીડીપી ગ્રોથ 8 ટકાનો અંદાજ મૂક્યો હતો.
રૂપિયો 77.5 સુધી લપસી શકે છે :
ક્રૂડ ઓઈલમાં વધારાને કારણે ભારતીય ચલણ રૂપિયા પર પણ દબાણ વધી રહ્યું છે.એસબીઆઈના અર્થશાસ્ત્રીઓનું કહેવું છે કે જો બંને દેશો વચ્ચે યુદ્ધ વધુ વકરશે તો ડોલર સામે રૂપિયાનું અવમૂલ્યન વધુ વધશે. એસબીઆઈના રિપોર્ટમાં અનુમાન લગાવવામાં આવ્યું છે કે જૂન, 2022 સુધીમાં ડોલર સામે રૂપિયો 77.5ના સ્તર સુધી ગગડી શકે છે.
ક્રૂડ ઓઈલના ભાવ પર અસર :
તાજેતરમાં બ્રેન્ટ ક્રૂડના ભાવમાં વધારાને કારણે રૂપિયો ડોલર સામે 77ના સ્તરે પહોંચ્યો ત્યારે ક્રૂડ ઓઈલના ભાવની અસર પણ રૂપિયા પર જોવા મળી હતી.એસબીઆઈના ચીફ ઈકોનોમિસ્ટ સૌમ્યકાંત ઘોષે કહ્યું કે જો ક્રૂડ ઓઈલની સરેરાશ કિંમત 130 પર રહે તો ચાલુ ખાતાની ખાધ જીડીપીના 3.5 ટકા સુધી પહોંચી શકે છે.આ કિસ્સામાં આગામી નાણાકીય વર્ષ માટે સરેરાશ ફુગાવો 5.7 ટકા સુધી વધી શકે છે. સોમવારે સરકાર દ્વારા જાહેર કરવામાં આવેલા આંકડા અનુસાર,ફેબ્રુઆરી મહિનામાં દેશમાં જથ્થાબંધ મોંઘવારી જાન્યુઆરીની સરખામણીમાં વધીને 13.11 ટકા થઈ ગઈ છે અને તે સતત 11મા મહિને ડબલ ડિજિટમાં રહી છે.આ સાથે ભારતમાં રિટેલ મોંઘવારીનો આંકડો પણ જાન્યુઆરીની સરખામણીમાં વધીને 6.07 ટકા થયો છે.
આઉટલુક પણ નેગેટીવ :
રશિયા અને યુક્રેન વચ્ચેના યુદ્ધની રોકાણકારોના સેન્ટિમેન્ટ પર નકારાત્મક અસર પડી છે કારણ કે વૈશ્વિક તેલના પુરવઠામાં રશિયા 14 ટકા અને કુદરતી ગેસના પુરવઠામાં 17 ટકા યોગદાન આપે છે અને આ યુદ્ધને કારણે સપ્લાય ચેઈન પર વિપરીત અસરો થવાની ભીતિ વધુ ઘેરી બની છે.આવી સ્થિતિમાં ટૂંકા ગાળામાં રૂપિયા પર દબાણ જોવા મળી રહ્યું છે.રિપોર્ટ અનુસાર વિદેશી રોકાણકારોએ ઓક્ટોબર-ડિસેમ્બર ક્વાર્ટરમાં રૂ. 2 લાખ કરોડનું રોકાણ પરત ખેંચ્યું છે.ઉપાડ બાદ ભારતીય બજારોમાં FPIsનો હિસ્સો બે ટકા ઘટીને 654 અબજ ડોલર થયો છે,જે અગાઉના ક્વાર્ટરમાં 667 અબજ ડોલર હતો.
