નવી દિલ્હી : યુક્રેન સાથેના યુદ્ધમાં જુદાજુદા દેશો પરમાણુ હુમલાની આશંકા દર્શાવી ચૂક્યા છે ત્યારે વિશ્વના અગ્રણી દેશોમાં પરમાણુ શસ્ત્રોની હોડ જામી છે.એક અહેવાલ મુજબ ભારત પણ પરમાણુ તાકાત વધારી રહ્યું છે.સ્ટોકહોમ સ્થિત ડિફેન્સ થિંક ટેન્ક SIPRIએ સોમવારે દાવો કર્યો હતો કે,જાન્યુઆરી ૨૦૨૨માં ભારત પાસે ૧૬૦ પરમાણુ વોરહેડ્સ હતા અને દેશ તેની તાકાત વધારી રહ્યું હોવાનું જણાય છે.
સ્ટોકહોમ ઇન્ટરનેશનલ પીસ રિસર્ચ ઇન્સ્ટિટ્યુટ(SIPRI)ના જણાવ્યા અનુસાર“પાકિસ્તાન પણ તેની પરમાણુ તાકાત વિસ્તારી રહ્યું હોવાનું જણાય છે.ચીને પરમાણુ હથિયારોનું નોંધપાત્ર વિસ્તરણ કર્યું છે અને હજુ કરી રહ્યું છે.સેટેલાઇટ તસવીરો ૩૦૦ નવા મિસાઇલ સાઇલોનું નિર્માણ થઈ રહ્યું હોવાનું દર્શાવે છે.જાન્યુઆરી ૨૦૨૧ અને ૨૦૨૨માં ચીન પાસે ૩૫૦ પરમાણુ વોરહેડ્સ હતા. આમ તો જાન્યુઆરી ૨૦૨૨માં પણ ચીનના પરમાણુ વોરહેડ્સની સંખ્યા જાન્યુઆરી ૨૦૨૧ જેટલી જ છે.જોકે,વપરાશ માટે તૈયાર વોરહેડ્સની સંખ્યામાં વધારો થયો છે.કારણ કે નવા લોન્ચર્સ ૨૦૨૧માં કાર્યરત બનશે.”
ભારતના પરમાણુ વોરહેડ્સની સંખ્યા જાન્યુઆરી ૨૦૨૧ના ૧૫૬થી વધીને જાન્યુઆરી ૨૦૨૨માં ૧૬૦ થઈ છે.સમાન ગાળામાં પાકિસ્તાનના વોરહેડ્સ ૧૬૫ના સ્તરે સ્થિર રહ્યા છે.SIPRIએ દાવો કર્યો હતો કે, “ભારત અને પાકિસ્તાન પરમાણુ તાકાત વધારી રહ્યા હોવાનું મનાય છે.”ઉલ્લેખનીય છે કે,ભારત પરમાણુ શસ્ત્રોનો સત્તાવાર ડેટા આપતું નથી.SIPRIના જણાવ્યા અનુસાર પરમાણુ દેશોના પરમાણુ શસ્ત્રોની સંખ્યા અને ક્ષમતા અંગે ભરોસાપાત્ર માહિતી મળવાનું મુશ્કેલ છે.ભારત અને પાકિસ્તાન મિસાઇલના પરીક્ષણ અંગે નિવેદન કરે છે,પણ તેમના પરમાણુ શસ્ત્રોની સંખ્યા અંગે માહિતી આપતા નથી.”
