મહુવાના તલગાજરડા ખાતે જન્મેલા અને રામાયણના કથાકાર તરીકે વૈશ્વિક ઓળખ મેળવનારા મોરારી બાપુ છેલ્લા કેટલાક સમયથી વિવિધ કારણોસર વિવાદમાં રહે છે.ત્યારે તાજેતરમાં તેમણે પોતાના જૂના વિવાદને યાદ કરીને રાષ્ટ્રીય સ્વયંસેવક સંઘ (RSS)ના સરસંઘચાલક ડો. મોહન ભાગવતનું નામ લીધા વગર જ તેમની ઈમામ સાથેની મુલાકાત મામલે પોતાના ટીકાકારો પર નિશાન સાધ્યું હતું.ઉલ્લેખનીય છે કે, આરએસએસના સરસંઘચાલક ડો. મોહન ભાગવતે સપ્ટેમ્બર મહિનાના છેલ્લા સપ્તાહ દરમિયાન કસ્તૂરબા ગાંધી માર્ગ સ્થિત મસ્જિદમાં અખિલ ભારતીય ઈમામ સંગઠનના મુખ્ય ઈમામ સહિતના મુસ્લિમ નેતાઓ સાથે બેઠક કરી હતી.તેના પહેલા તેઓ પૂર્વ મુખ્ય ચૂંટણી અધિકારી એસ.વાઈ. કુરૈશી અને દિલ્હીના પૂર્વ ઉપરાજ્યપાલ નજીબ જંગ સહિતના અનેક મુસ્લિમ બુદ્ધીજીવીઓને પણ મળ્યા હતા.
મહુવાના ભવાની મંદિર ખાતે ચાલી રહેલી સપ્તાહ દરમિયાન સંઘના વડા મોહન ભાગવતનું નામ લીધા વગર જ ટિપ્પણી કરીને મોરારી બાપુ ફરી એક વખત ચર્ચામાં આવ્યા છે.તેમણે કોઈનું નામ લીધા વગર જ પોતે કથા દરમિયાન શેર બોલે,ગઝલ ગાય… એમાં કોઈ ઉર્દુ શબ્દ આવે.. પોતે બધાને ભેગા કરવા પ્રયત્ન કરે તો સૌ તૂટી પડતાં હતા તેમ યાદ કરાવ્યું હતું.સાથે જ તાજેતરમાં હિંદુત્વના મોભી મસ્જિદમાં જઈને બધાને મળી આવ્યા ત્યાં બધા કેમ ચૂપ છે તેવી ફરિયાદ સાથે કોઈક તો ટીકા કરો એવી ટીખળ કરી હતી.
શું હતો એ વિવાદ
ઉલ્લેખનીય છે કે, મોરારી બાપુ પોતાની કથામાં કોઈક વખત 2-5 મિનિટ માટે અલી મૌલાની ધૂન ગવડાવીને સર્વધર્મ સમભાવની લાગણી ફેલાવવા પ્રયત્ન કરતા હતા.જોકે 2 વર્ષ પહેલા તેમની એટલી ક્લિપ વાયરલ કરીને તેઓ 6 દાયકાથી ઈસ્લામનો પ્રચાર કરી રહ્યા છે તેવો વિરોધ કરવામાં આવ્યો હતો.તે સમયે અલી મૌલાની ધૂન ગવડાવીને મોરારી બાપુ
આતંકવાદીઓનું સમર્થન કરતાં હોવાની છાપ ઉભી કરીને તેમના વિરોધમાં માહોલ કરવામાં આવ્યો હતો.
મોરારી બાપુ સાથે સંકળાયેલા અન્ય વિવાદો
અગાઉ એક કથામાં મોરારી બાપુએ ભગવાન સ્વામિનારાયણના નીલકંઠવર્ણી રૂપ અંગે ટિપ્પણી કરી હતી.તેના કારણે સ્વામિનારાયણ ધર્મના અનુયાયીઓમાં ભારે રોષ વ્યાપ્યો હતો.મોરારી બાપુએ કહ્યું હતું કે, ‘નીલકંઠનો અભિષેક એટલે શિવનો જ અભિષેક થાય છે.કોઈ પોતાની શાખામાં નીલકંઠનો અભિષેક કરે તો તે શિવ નથી બનાવટી નીલકંઠ છે.નીલકંઠનું છેતરામણું રૂપ આવતું જાય છે.જેમણે ઝેર પીધું હોય તે નીલકંઠ કહેવાય.જેમણે લાડુડીઓ ખાધી હોય તે નીલકંઠ ન હોય.’ તે સમયે અન્ય સંપ્રદાયના સાધુઓ મોરારી બાપુના સમર્થનમાં જોવા મળ્યા હતા અને વિશ્વ હિંદુ પરિષદે તમામ સાધુઓને સમાધાન કરવા પત્રો લખ્યા હતા.બાદમાં વિવાદનો અંત આવ્યો હતો અને સ્વામિનારાયણ સંપ્રદાયે તેઓ મોરારી બાપુ વિરૂદ્ધ કોઈ વિવાદિત નિવેદન નહીં કરે તેવી ખાતરી આપી હતી.તે સિવાય મોરારી બાપુની ભગવાન દ્વારકાધીશ માટેની ટિપ્પણીના કારણે આહીર સમાજમાં ભારે રોષ વ્યાપ્યો હતો.
શ્રી કૃષ્ણ અને યદુવંશ અંગેની વિવાદિત ટિપ્પણી બાદ મોરારી બાપુ દ્વારકા પહોંચ્યા ત્યારે ભાજપના નેતા પબુભા માણેક મોરારી બાપુ તરફ ધસી ગયા હોય તેવો વીડિયો પણ સામે આવ્યો હતો.જોકે, પૂનમ માડમ સહિતના અગ્રણીઓએ પબુભાને મોરારી બાપુ તરફ ધસી જતાં અટકાવ્યા હતા.
