મધ્યઝોનમાં પાણી પોલ્યુશન કંટ્રોલ બહાર, ખાડિયા વોર્ડમાં પુરતા પ્રેસરથી પાણી ન મળવાની સાથે પ્રદૂષણની ફરિયાદ

અમદાવાદ,શુક્રવાર,15 એપ્રિલ,2022 : અમદાવાદના મધ્યઝોનમાં પાણીના પોલ્યુશનની પરિસ્થિતિ કંટ્રોલ બહાર જઈ રહી છે.નાગરીકોને પાણી પુરતા પ્રેસરથી ના મળવાની સાથે પ્રદૂષિત પાણીની ફરિયાદો વધારો થઈ રહ્યો છે.આમ છતાં પણ તંત્ર આ ફરિયાદોને ઉકેલવામાં સદંતર નિષ્ફળ પુરવાર થઈ રહ્યુ છે.ઉનાળાની કાળઝાળ ગરમી તેનો પ્રકોપ બતાવી રહી છે.શહેરમાં ઓરેન્જ એલર્ટ જાહેર કરવામાં આવ્યું છે.આ પરિસ્થિતિમાં મધ્યઝોનના ખાડિયા વોર્ડમાં બેકાબૂ બની રહેલી પ્રદૂષિત પાણીની સમસ્યા ના ઉકેલાવાના કારણે રહીશો ત્રાહિમામ બની રહ્યા છે.ખાડિયા વોર્ડમાં રાયપુર દરવાજા બહાર આવેલી મનુભાઈ દેવશશીભાઈની ચાલી, અંકુર મિલની ચાલી,ચુનારા વાસ, રઘુનાથપુરાની પીઠ, સિટી મીલ કમ્પાઉન્ડ વિસ્તારમાં છેલ્લા ઘણાં સમયથી પાણી પુરતા પ્રેસરથી મળતુ ના હોવાની ફરિયાદો વ્યાપક બનવા પામી છે.
આ વિસ્તારોમાં રહેતા નાગરિકોની બીજી સમસ્યા એ પણ છે કે,જે થોડુ ઘણું પાણી આવે છે એ પણ પુરતા પ્રેસરથી મળતુ નથી.અસહ્ય દુર્ગંઘ મારતુ પાણી આવી રહ્યુ છે.આ તમામ વિસ્તારો એવા છે કે જયાં ગરીબ અને શ્રમજીવી વર્ગના પરિવારો વસવાટ કરી રહ્યા છે.પ્રદૂષિત પાણી પીવાના કારણે ઝાડા-ઉલટીના કેસમાં પણ સતત વધારો થતો જોવા મળી રહ્યો છે.દવાખાનાના ખર્ચ આ લોકોને પોષાય એમ નથી.ડોકટરો પાસે જયારે નાના બાળકોને લઈ જવામાં આવે છે ત્યારે ડોકટર બાટલા ચડાવવાનુ કહેતા આ પરિવારના લોકો માત્ર દવા લઈને પરત આવતા હોય છે.પાણીનું પોલ્યુશન બંધ થાય એ જ મોટી દવા હોવાનું સ્થાનિકામાંથી જાણવા મળ્યુ છે.સ્થાનિક કોર્પોરેટરોનું મ્યુનિસિપલ તંત્રમાં કાંઈ ઉપજતુ ના હોવાની છાપ પણ આ વિસ્તારના રહીશોમાં જોવા મળી રહી છે.ગટર લાઈન સાફ કરાવવી જરૃરી છે.કોન્ટ્રાકટરોના નવ મહિનાના બિલના પેમેન્ટ કરાતા ના હોવાથી કોન્ટ્રાકટરો નવા કામ હાથ ઉપર લેતા નથી.સી.સી.ટી.વી.કેમેરાથી ડિસીલ્ટીંગ કરાવવાના બદલે બકેટ રીક્ષાથી ડીસીલ્ટીંગ કરાવવાની જરુર છે.આ પરિસ્થિતિ મધ્યઝોનના દરીયાપુર,અસારવા ઉપરાંત જમાલપુર તેમજ શાહપુર અને દૂધેશ્વરમાં પણ જોવા મળી રહી છે.આ છે સ્માર્ટસિટી અમદાવાદ મ્યુનિસિપલ કોર્પોરેશનનું સ્માર્ટ વહિવટી તંત્ર.