ગાંધીનગર, 21 માર્ચ 2023 મંગળવાર : ગૃહ વિભાગની માંગણીઓ પર ચર્ચા દરમિયાન કોંગ્રેસના ધારાસભ્ય શૈલેષ પરમારે મહાઠગ કિરણ પટેલનો ઉલ્લેખ કર્યો હતો.રાજ્યના પોલીસ વિભાગના આઈબીનું નામ લેતા શૈલેષ પરમારે જણાવ્યું હતું કે, પીએમઓમાં જોબ કરું છું તેવુ કહીને મહાઠગ કિરણ પટેલ સરકારી તંત્રનો દુરુપયોગ કર્યો. કિરણ પટેલના તાર ગુજરાત સુધી જોડાયેલા છે છતાં રાજ્યનું આઈબી કંઈ કરી ન શક્યું નથી.
રાજ્યની કાયદો-વ્યવસ્થા સામે સવાલ
શૈલેષ પરમારે રાજ્યમાં કાયદો અને વ્યવસ્થા પર સવાલ ઉઠવતા જણાવ્યું હતું કે, રાજ્યમાં કરાઈ એકેડેમીમાં બોગસ પીએસઆઇની ઘટના,આઈએએસ,આઇપીએની જાસૂસી થાય છે,પેપરલીક જેવી ઘટના બને છે,સરકારનો પાયલટ બે વર્ષ સુધી અંગત ઉપયોગ માટે સરકારી વિમાનનો દુરુપયોગ કરે છે.આ સ્થિતિ પરથી લાગે છે કે રાજ્યમાં કાયદો અને સલામતીની સ્થિતિ સારી નથી.
ગૃહ વિભાગના બે એન્જીન, બાતમીદાર અને વહીવટદાર
શૈલેષ પરમારે રાજ્યમાં દારૂ અને ડ્રગ્સના દૂષણ વિશે વાત કરતા જણાવ્યું હતું કે, જેમ ડબલ એન્જીનની સરકાર છે.તેમ ગૃહ વિભાગ પણ ડબલ એન્જીનથી ચાલે છે.ગૃહ વિભાગના પ્રથમ એન્જીન એટલે બાતમીદાર અને બીજું એન્જીન એટલે વહીવટદાર છે.ગૃહ વિભાગનું જેટલું બજેટ નથી,એટલી રકમનો દારૂ અને ડ્રગ્સ પકડાય છે.રાજ્યની સ્ટેટ મોનીટરીંગ સેલ દ્વારા સારી કામગીરી કરવામાં આવી રહી છે.સ્ટેટ મોનીટરીંગ સેલના વડા નિલિપ્ત રાયને અભિનંદન આપું છે.જો કે, નિલિપ્ત રાયની પણ જાસૂસી કરવામાં આવે છે.તે રેડ પાડવા જવાના હોય તે પહેલાં બુટલેગરને રેડની ખબર પડી જાય છે.જે પોલીસ વિભાગ માત્ર શરમજનક બાબત છે.
પોલીસ બે ભાગમાં વહેંચાઈ
પોલીસ બે ભાગમાં વહેંચાઈ ગયું છે.પોલીસ અને સ્કોડ આમને-સામને આવી ગઈ છે.વહીવતદારો હપ્તા ઉઘરાવાનું કામ કરે છે,તે જ વહીવટદારોને લીધે સ્કોડ રેડ પાડી શકતી નથી.શૈલેષ પરમારે રાજ્યના પોલીસ સ્ટેશનમાં ચાલતા વહીવતદારોના રાજ પર સવાલ ઉઠવ્યાં હતાં.વહીવટદારોને લીધે દારૂનું વેચાણ વધી રહ્યું છે.વહીવતદારોને લીધે બુટલેગરો સામે કાર્યવાહી થતી નથી.
9 વર્ષમાં 14322 દૂષ્કર્મના ગુના નોંધાયા
રાજ્યમાં નેશનલ ફેમિલી હેલ્થના રિપોર્ટ પ્રમાણે રાજ્યમાં મહિલાઓમાં દારૂનું વ્યસન વધી રહ્યું છે.રાજ્યમાં 2014થી 2022 સુધી રાજ્યમાં 14322 દૂષ્કર્મના ગુના નોંધાયા છે.જેમાં માત્ર 231 ગુનાઓ સાબિત થયા છે.રાજ્યના પોલીસ વિભાગમાં 14 હજાર જગ્યાઓ ખાલી છે જે ભરવામાં આવતી નથી.આ ઉપરાંત શૈલેષ પરમારે જણાવ્યું હતું કે, મારા મત વિસ્તારમાં ખુલ્લેઆમ દારૂ વેચાય છે.રાજ્ય સરકારને પત્ર લખીને જાણ કરવા છતાં હજી સુધી કોઈ કાર્યવાહી કરવામાં આવી નથી.
