વિધાનસભા ચૂંટણીમાં ટિકિટ ન મળતા વિવિધ સીટિંગ MLAએ એન મોટા નેતાઓએ પોતાના જ પક્ષ સામે બાંયો ચડાવી છે.કોઈ અપક્ષ ઉમેદવારી કરવાની તૈયારી કરી રહ્યા છે,તો કોઈ ટિકિટ માટે આમ આદમી પાર્ટીમાં જોડાઈ રહ્યાં છે.જો કે ખેડા જિલ્લાની માતરના ભાજપ ધારાસભ્ય કેસરીસિંહ સોલંકીએ જે પક્ષપલટો કર્યો, એવું ગુજરાતમાં ભાગ્યે જ કોઈએ કર્યું હશે.
ખેડા જિલ્લાની માતર બેઠકના ભાજપના ધારાસભ્ય બે દિવસ પહેલા ભાજપમાંથી રાજીનામું આપી આમ આદમી પાર્ટીમાં જોડાયા હતા.આમ આદમી પાર્ટીના પ્રદેશ અધ્યક્ષ ગોપાલ ઈટાલીયાએ તેમને પાર્ટીનો ખેસ પહેરાવીને AAPમાં સ્વાગત કર્યું હતું.આમ આદમી પાર્ટીએ માતર બેઠક પરથી મહીપતસિંહ ચૌહાણની જાહેર કરેલી ટિકિટ પાછી લઈને કેસરીસિંહને આ બેઠકની ટિકિટ આપી હતી.જો કે આ ઘટનાના 39 કલાક બાદ જ કેસરીસિંહે ગુલાંટ મારી અને ફરી ભાજપમાં જોડાઈ ગયા.એટલે કે કેસરીસિંહ આમ આદમી પાર્ટીમાં આંટો મારી આવીને ફરી ભાજપમાં જોડાઈ ગયા છે.આ ઘટનાની ગુજરાતના રાજકારણમાં ખુબ ચર્ચાઓ થઇ રહી છે,પણ રાજકારણમાં કશું જ અશક્ય નથી.ભાજપે માતર બેઠક પર કેસરીસિંહને વેંતરીને કલ્પેશ પરમારને ટિકિટ આપતા કેસરીસિંહ નારાજ થયા હતા.આગામી વિધાનસભાની ચૂંટણીમાં રાજ્યમાં લાંબામાં સમય બાદ ત્રિપાંખીયો જંગ જોવા મળશે.લાંબા સમયથી રાજ્યામાં માત્ર ભાજપ અને કોંગ્રેસ આમ બે રાજકીય પાર્ટીઓ વચ્ચે ખરાખરીનો જંગ જોવા મળતો હતો.પરંતુ ગુજરાત વિધાનસભા-2022ની ચૂંટણીમાં આ વખતે રાજ્યમાં ભાજપ, કોંગ્રેસ અને આમ આદમી પાર્ટી વચ્ચે જંગ ખેલાઇ રહ્યો છે.તમામ રાજકીય પાર્ટીઓ સામે પક્ષના દમદાર નેતાને પોતાની તરફ લાવવા માટે એડીચોટીનુ જોર લગાવી રહ્યાં છે.તો કેટલાક પક્ષથી નારાજ થઇ અન્ય પાર્ટીમાં જોડાઇ રહ્યાં છે.તેવામાં તાજેતરમાંજ માતર વિધાનસભાના પૂર્વ ધારાસભ્ય કેસરીસિંહ સોલંકી જેઓ થોડા સમય પહેલા જ પંચમહાલની એક રિસોર્ટ જુગાર રમતા પોલીસના હાથે ઝડપાયા હતા.જેમાં કોર્ટે તેઓને સજા પણ ફટકારી અને વિધાનસભા-2022ની ચૂંટણીમાં તેઓનુ પત્તુ પણ કપાઇ ગયું હતુ.જેથી ભાજપથી નારાજ થઇ કેસરીસિંહએ આમ આદમી પાર્ટીનો હાથ ઝીંલ્યો હતો.આ જોતા ભાજપે કેસરીસિંહ જેવા અનેક નારાજ નેતાઓને મનાવવા અને ડેમેજ કંટ્રોલ કરવા કેટલાક સિનિયર નેતાઓને મેદાનમાં ઉતાર્યા છે.જેના પરિણામે આમ આદમી પાર્ટીમાં જોડાયેલા કેસરીસિંહનુ ભાજપે 24 કલાકમાં ઓપરેશન પાર પાડી ઘર વાપસી કરાવી દીધી છે.
