નવી દિલ્હી : રાષ્ટ્રપતિપદની ચૂંટણીમાં વિપક્ષના સંયુક્ત ઉમેદવાર યશવંત સિંહાએ રવિવારે કહ્યું હતું કે રાષ્ટ્રપતિની ચૂંટણી વ્યક્તિગત સ્પર્ધા કરતાં ઘણી વધુ મહત્વની છે અને આ સરકારના એકાધિકારનો વિરોધ કરવાની દિશામાં એક ડગલું છે.સિંહાએ કહ્યું હતું કે તેમના પુત્ર જયંત સિંહા ભાજપના સાંસદ છે તેમ છતાં ભાજપની વિરુદ્ધ રાષ્ટ્રપતિપદની ચૂંટણી લડવા અંગે તેમને જરા પણ‘ધર્મ સંકટ’હોય તેવું લાગતું નથી,તેમણે કહ્યું કે “તેઓ(પુત્ર જયંત સિંહા)તેમનો રાજધર્મ નિભાવે છે,હું મારો રાષ્ટ્રધર્મ નિભાવીશ.” સિંહાએ કહ્યું કે આ ચૂંટણી માત્ર ભારતના રાષ્ટ્રપતિની ચૂંટણી નથી.આ સરકારની એકાધિકારવાદ સાથેની નીતિઓનો વિરોધ કરવાની દિશામાં એક ડગલું છે.આ ચૂંટણી દેશની જનતાને સંદેશો છે કે આ નીતિઓનો વિરોધ કરવો જોઈએ.
ભાજપની આગેવાની હેઠળના એનડીએના ઉમેદવાર આદિવાસી નેતા દ્રૌપદી મુર્મૂ છે તે અંગે તેમણે કહ્યું કે એક જ વ્યક્તિ આગળ આવે એટલે આખો સમાજ આગળ આવી ગયો તેવું નથી.ભાજપે રાજકીય પ્રતીક સ્વરૂપે મુર્મૂને આ પદ માટે પસંદ કર્યા છે.સિંહાએ ઉમેર્યું કે “જાહેર જીવનના મારા લાંબા અનુભવ પરથી હું કહી શકું કે કોઈ એક વ્યક્તિ આગળ આવે એનો અર્થ આખો સમાજ આગળ આવ્યો તેવું નથી.સમગ્ર સમુદાય આગળ આવે તેના માટે સરકાર જે નીતિઓ નક્કી કરે તેના પર આધાર છે.
હું આ અંગે વધુ કંઈ નહીં કહું,પણ આપણા સમાજમાં ઘણાં ઉદાહરણો છે કે એક વ્યક્તિ આગળ વધી હોય,પરંતુ સમાજમાં સહેજ પણ પ્રગતિ થઈ ન હોય.આ માત્ર પ્રતીકાત્મક છે,તેનાથી વિશેષ કંઈ નહીં.” તેમણે કહ્યું કે આ ચૂંટણી વ્યક્તિગત કરતાં ઘણી મોટી છે અને જ્યાં સુધી સમગ્ર સિસ્ટમમાં સુધારા નહીં થાય ત્યાં સુધી અંધકાર દૂર નહીં થાય.આપણા લોકતંત્ર,આપણા બંધારણ પર જોખમ ઊભું થયું છે, સ્વતંત્રતા સંગ્રામના તમામના તમામ મૂલ્યો પર જોખમ ઊભું થયું છે….ભારત પર જોખમ છે આથી સમગ્ર ભારતે ભારતને બચાવવા માટે જાગવું પડશે.”
