બારડોલી : સુરત જિલ્લાના બારડોલીમાં મિનારા મસ્જિદ પાસે દીવો પ્રગટાવી મસ્જિદના દરવાજા પર ગુલાલ ફેંકવાની ઘટનામાં પોલીસે જાતે ફરિયાદી બની અજાણ્યા વિરુદ્ધ ગુનો નોંધ્યો છે અને એકની અટાકાયત કરવામાં આવી છે.
દશામાની વિસર્જન યાત્રા દરમિયાન 6 ઓગસ્ટની રાત્રિએ મિનારા મસ્જિદ પાસે દીવો અને મસ્જિદ પર ગુલાલ નજરે પડતાં મુસ્લિમ સમાજમાં રોષની લાગણી ફેલાઈ ગઈ હતી.મસ્જિદની સામેના મકાનમાં CCTV ચેક કરતાં તેમાં રાત્રિના બેથી અઢી વાગ્યાની આસપાસ કેટલાક ઇસમો વિસર્જનમાં ચાલતા જતા દેખાતા હતા,એ પૈકી એક ઇસમે હાથમાંનો ગુલાલ મસ્જિદ પર નાંખતો નજરે પડે છે.તો કેટલીક યુવતીઓ દીવો પ્રગટાવી રહી નજરે પડતી હતી.શહેરમાં કોમી શાંતિ ડહોળવા માટે કોઈ અસમાજિક તત્ત્વો દ્વારા આ કૃત્ય કરવામાં આવ્યું હતું.પોલીસે CCTV ફૂટેજ કબજે લીધા હતા.બાદમાં બારડોલી ફાયર વિભાગથી મસ્જિદની સફાઈ કરાવી હતી.ગંભીર ઘટનાને પગલે બારડોલી ટાઉન પોલીસમથકના પી.એસ.આઇ. બી.કે.પટેલ જાતે ફરિયાદી બન્યા હતા.તેમણે અજાણ્યા ઈસમ વિરુદ્ધ બે સમુદાય વચ્ચે વિખવાદ ઊભો કરી શાંતિભર્યું વાતાવરણ ડહોળવાનો પ્રયત્ન કરવો અને ધાર્મિક લાગણી દુભાય તેવું કૃત્ય કરવા બદલ ગુનો નોંધી આગળની તપાસ હાથ ધરી એકની અટકાયત કરી છે.
