– પ્રાંત કચેરીએ ખાતે અપિલ કરવા રૂ.50,000/-ની માંગી લાંચ
– એસીબીની ટીમ દ્વારા છટકું ગોઠવી રંગેહાથ ઝડપી પડાયો
હાલના સમયમાં બાપદાદાની મિલકતોને પોતાને નામ કરાવાની પ્રોસેસમાં ખૂબ લાંબો સમય લાગે છે.તેમજ કેટલાક ધક્કા પણ ખાવાના વારા આવતા હોય છે.કેટલાક લોકોને કમિશન પણ આપવા લોકો મજબૂર બને છે.ગાંધીનગરમાં આવેલા માણસામાં પણ કંઈક આવી જ ઘટના બની છે.જેમાં એક જાગૃત નાગરિક દ્વારા નાયબ મામલતદાર ગિરીશ પંડ્યા વિરુદ્વ લાંચ માંગી હોવાની ફરિયાદ કરતા એસીબીની ટીમ દ્વારા રંગે હાથ ઝડપી પાડવામાં આવ્યો.
પોલીસમાં નોંધાયેલી ફરિયાદ અનુસાર, ફરિયાદીના કબ્જાની માલિકીની લાકરોડ ગામની સીમમાં વડીલો પાર્જીત જમીન આવેલી છે.જેમાં ફરિયાદીએ વારસાઈ નોંધ દાખલ કરાવવા માણસા મામલતદાર કચેરીમાં અરજી કરી હતી.જે અંગે કચેરીના મામલતદારે અરજી રજીસ્ટરેથી કમી કરવા હુકમ આપ્યો હતો.પરંતુ, આ અંગે નાયબ મામલતદાર ગિરીશ પંડ્યા દ્વારા જણાવવામાં આવે છે કે, પુન;વિચારણા કરી નામ દાખલ કરાવવા અંગે પ્રાંત કચેરી ખાતે અપિલ કરવી પડશે.
પ્રાંત કચેરીએ અપિલ દાખલ કરાવવા માટે નાયબ મામલતદાર ગીરીશ ગોવિંદલાલ પંડ્યા દ્વારા રૂ.50,000/-રકમની લાંચની માંગણી કરવામાં આવી હતી.તે પૈકીના આજરોજ રૂ.૧૦,૦૦૦/-ની રકમની લાંચની માંગણી કરી હતી.જો કે, આ લાંચની રકમ આપવા ન માંગતો હોવાથી ફરિયાદી દ્વારા એસીબીનો સંપર્ક કરવામાં આવ્યો હતો.ફરિયાદી દ્વારા એસીબીનો સંપર્ક કરી સમગ્ર ઘટના વિશે જણાવી નાયબ મામલતદાર ગિરીશ પંડ્યા વિશે ફરિયાદ નોંધાવવામાં આવી હતી.
ફરિયાદી દ્વારા નોંધાવેલી ફરિયાદને આધારે એસીબી દ્વારા લાંચિયા આરોપીને પકડી પાડવા છટકાનું આયોજન કરવામાં આવ્યું હતું.જેમાં ફરિયાદી દ્વારા મામલતદાર સાથે લાંચ સ્વીકારવા માટે મામલતદાર કચેરીએ મળવાનું નક્કી કરાતા એસીબીની ટીમ કચેરીએ વોચમાં ગોઠવાઈ ગઈ હતી.જ્યાં થોડા સમય બાદ ફરિયાદી અને નાયબ મામલતદાર ગિરીશ પંડ્યા સાથે પંચની હાજરીમાં લાંચને લગતી હેતુલક્ષી વાતચીત કરી હતી.ત્યારબાદ નાયબ મામલતદાર ગિરીશ પંડ્યા દ્વારા ફરિયાદી પાસેથી લાંચની રકમ રૂ.10,000/- સ્વીકારતા એસીબીની ટીમ ત્રાટકી પડી હતી.એસીબીની ટીમ દ્વારા નાયબ મામલતદારને લાંચ લેતા રંગેહાથ ઝડપી પાડવામાં આવ્યો હતો.ત્યારબાદ સ્વીકારેલી લાંચની રકમ રીકવર કરી કાયદેસરની કાર્યવાહી હાથધરવામાં આવી હતી.
