– આ જ બિલ્ડિંગમાં શાહીદ કપૂરે ૫૫ કરોડમાં ફ્લેટ લીધો છે
– ફ્લેટ દીઠ 6 કારનું પાર્કિંગ મળશેઃ 9 કરોડની સ્ટેમ્પ ડયૂટી ભરાઈઃ મુંબઈમાં 10 કરોડથી વધુ કિંમતના 2700થી વધુ ફ્લેટ વેચાવા બાકી
મુંબઈ : ગયા અઠવાડિયે નોંધાયેલા એક સોદા સાથે જ શહેરનું લક્ઝરી રિયલ્ટી માર્કેટ નવા ઉંચા સ્તરે જોવા મળી રહ્યું છે.આ સોદામાં ડેવલપરને વર્લીમાં એક લક્ઝરી બિલ્ડિંગમાં બે ફ્લેટ માટે રૃા. ૧૫૧ કરોડ મળ્યા છે.પ્રત્યેક ફ્લેટની કિંમત રૃા. ૭૫.૫ કરોડ છે અને પ્રત્યેક ફ્લેટનો એરિયા ૮,૦૩૬ ચો.ફીટ છે.એટલે કુલ ૧૬,૦૭૨ ચો.ફીટના કુલ એરિયાનો સોદો રૃા. ૧૫૧ કરોડમાં થયો છે.ફ્લેટ ખરીદનારને સાથે છ કાર પાર્કિંગ પણ મળશે.
આ સોદો અલ્ટ્રા-લક્ઝરી પ્રોજેક્ટ થ્રી સિક્સ્ટી વેસ્ટમાં થયો હતો,જ્યાં શાહિદ કપૂર સહિત અનેક ટોચના બિઝનેસ અને બોલિવૂડ સેલિબ્રિટીઓનું પણ ઘર છે.એની બેસન્ટ રોડ પર આવેલા આ આધુનિક ટાવરની બી વિંગના ૫૮ અને ૫૯ માળે આ ફ્લેટો છે.આ સોદો ૮મી સપ્ટેમ્બરે રજિસ્ટર થયો હતો અને તેના પર ખરીદદાર દ્વારા કુલ રૃા. ૯ કરોડની સ્ટેમ્પ ડયુટી ચુકવવામાં આવી હતી.
રિયલ એસ્ટેટ એજન્ટોના જણાવ્યા અનુસાર શહેરમાં રૃા. ૨.૭૯ લાખ કરોડની કિંમતના લગભગ ૧.૨૪ લાખ ફ્લેટ વેંચાયા વિનાના પડયા છે.એમાંથી પ્રત્યેક રૃા. ૧૦ કરોડથી વધુની કિંમતના ૨,૭૬૨ લક્ઝરી એપાર્ટમેન્ટ હજી વેંચાયા નથી.વૈભવી ફ્લેટની કુલ સંખ્યા કુલ વેંચાયા વિનાના ફ્લેટોના ૨ ટકા જેટલી જ છે પણ તેનું કુલ મૂલ્ય વેંચાયા વિનાના તમામ ફ્લેટોના ૨૧ ટકા જેટલું છે.
એક રિયલ્ટી બ્રોકરે આપેલી માહિતી અનુસાર ૨૦૦૯માં વૈભવી એપાર્ટમેન્ટ ૨૦ મહિના સુધી વેંચાયા વિના પડયા રહેતા હતા પણ હવે ૧૧૫ મહિના એટલે કે લગભગ ૧૦ વર્ષ સુધી વેંચાતા નથી. ઉપરાંત વૈભવી ફ્લેટોની કિંમતમાં પણ છેલ્લા આઠ વર્ષથી કોઈ ખાસ વધારો નોંધાયો નથી. રૃા. ૧૦ કરોડની રેન્જમાં વૈભવી સેગમેન્ટમાં સરેરાશ કિંમત ૨૦૧૪માં રૃા. ૬૯,૧૬૫ પ્રતિ ચોરસ ફુટ હતી જ્યારે ૨૦૨૨માં રૃા. ૬૯,૪૧૧ પ્રતિ ચોરસ ફુટ છે.
ઉલ્લેખનીય છે કે આ જ પ્રોજેક્ટમાં ૨૦૧૮માં હોલીવૂડ એક્ટર દ્વારા રૃા. ૫૫ કરોડમાં ખરીદાયેલા ડયુપ્લેક્સ સહિત અનેક મોટા સોદા નોંધાયા છે. ૨૦૧૮માં આ જ મકાનમાં ઉદ્યોગપતિ નીરજ બજાજે ૫૦માં માળે રૃા. ૧૨૦ કરોડમાં ફ્લેટ ખરીદ્યો હતો. ૨૦૧૮માં જ શાહિદ કપૂરે ૪૨માં અને ૪૩માં માળે રૃા. ૫૫.૬ કરોડમાં સોદો કર્યો હતો.સપ્ટેમ્બર ૨૦૨૦માં વિદર્ભના ચંદ્રપુર જિલ્લામાં ચિમુર મતદાર વિસ્તારમાંથી ભાજપના વિધાનસભ્ય કિર્તી કુમાર ભાંગડિયાએ ૨૬માં માળે રૃા. ૪૨.૫ કરોડમાં ફ્લેટ ખરીદ્યો હતો.નવેમ્બર ૨૦૨૧માં વેપાર ઉદ્યોગમાં જાણીતા નામ ઉમેશ ધરણીધરકા અને નિશા ધરણીધરકાએ ૩૦માં માળે રૃા. ૫૧ કરોડમાં ફ્લેટ ખરીદ્યો હતો.
ઉપરાંત એચડીએફસીના એક ટોચના અધિકારીએ બાન્દ્રા પશ્ચિમમાં એક નિર્માણાધીન પ્રોજેક્ટમાં રૃા. ૩૫ કરોડમાં ફ્લેટ ખરીદ્યો છે.
