– પાંચ શિવસૈનિકની ધરપકડ થતાં પોલીસ મથકે ટોળાં
– બંને જૂથ સામે હુલ્લડ સહિતની કલમો હેઠળ ગુનો દાખલ
મુંબઈ : મુંબઈમાં પ્રભાદેવી વિસ્તારમાં શનિવારની મોડી રાતે ઉધ્ધવ ઠાકરે તથા એકનાથ શિંદે જૂથના કાર્યકરો સામસામે આવી જતાં અથડામણ થઈ હતી.આ દરમિયાન, શિંદે જૂથના ધારાસભ્ય સદા સરવણકરે હવામાં ગોળીબાર કર્યાનો આક્ષેપો થયા છે. પોલીસે ધારાસભ્ય સહિત બંને જૂથના કાર્યકરો સામે હુલ્લડ સહિતની કલમો દાખલ કરી ગુનો નોંધ્યો હતો.આ અથડામણ સંદર્ભે ઉધ્ધવ જૂથના પાંચ કાર્યકરોની ધરપકડ કરવામાં આવી હતી.પોલીસ સૂત્રોના જણાવ્યા અનુસાર રાતે બારથી સાડા બારને અરસા૩માં પ્રભાદેવી વિસ્તારમાં બંને જૂથો સામસામે આવી ગયાં હતાં.શિંદે જૂથનો સંતોષ તલબલે પર મહેશ સાવંત તથા અન્ય ૩૦ના ટોળાએ હુમલો કર્યો હતો.
ઉધ્ધવ જૂથના સાંસદ અરવિંદ સાવંતના આક્ષેપ મુજબ શિંદે જૂથના ધારાસભ્ય સરવણકરે ગોળીબાર કરી ભયનું વાતાવરણ સર્જયું હતું.મહેશ સાવંત સહિત પાંચની ધરપકડના વિરોધમાં શિવસૈનિકોના ટોળાં દાદર પોલીસ મથકે ઉમટયાં હતાં. પોલીસે પકડેલા પાંચ શિવસૈનિકને મુક્ત કરવાની માગણી કરાઈ હતી.જોકે, બાદમાં પાંચેયનો જામીન પર છૂટકારો થયો હતો.શિંદે જૂથના સંતોષ તેલવણેએ ગણેશ વિસર્જન વખતે થયેલા વિવાદ અંગે ફેસબુક અને વોટસએપ પરની પોસ્ટમાં વાંધાજનક શબ્દોનો ઉપયોગ કર્યો હોવાનું કહેવાય છે. આ વિવાદના કારણે શિવસૈનિકોએ સંતોષ પર હુમલો કર્યો હતો.તેલવણેએ પોલીસમાં નોંધાવેલી ફરિયાદ મુજબ ‘ગણેશ વિસર્જન દરમિયાન પ્રભાદેવી જંકશન પાસે શિંદે જૂથ દ્વારા ગણેશ બક્તો માટે પાણીનો સ્ટોલ ઉભો કરવામાં આવ્યો હતો.ઉધ્ધવ ઠાકરે જૂથના મહેશ સાવંતે પણ તેમની બાજુમાં સ્ટોલ લગાવ્યો હતો.વિસર્જનની રાતે ૧૨ વાગ્યે એકબીજા બદલ નિવેદન કરવાથી વિવાદ થયો હતો.તે સમયે મામલો શાંત થઈ ગયો હતો.જોકે મહેશ સાવંત ગુસ્સામાં હતો. રવિવારે રાતે મહેશ,શૈલેશ માળી,સંજય ભગત સહિત અંદાજે ૩૦ કાર્યકર્તા બાંબૂ,ચોપર,લાકડી લઈને આવ્યા હોવાનો આરોપ તેલવણેએ કર્યો છે.
સાવંત અને તેના સાથીદારોએ ગાળો આપી મારપીટ કરી હતી.તે સમયે પોલીસ આવી જતા ભાગદોડમાં તેના ગળામાંથી પાંચ મુખી રુદ્રાક્ષ સહિત ૩૦ ગ્રામની સોનાની ચેન તફડાવી લેવામાં આવી હોવાનું સંતોષે ફરિયાદમાં કહ્યું હતું.પોલીસે કેસ નોંધી મહેશ સાવંત,શૈલેશ,સંજય અને અન્ય બે જણની ધરપકડ કરી હતી.આ અથડામણ બાદ દાદર પોલીસ સ્ટેશનની બહાર કાર્યકરોની ભીડ જમા થઈ ગઈ હતી.ભીડને કાબૂમાં લેવા પોલીસને હળવો લાઠીચાર્જ કરવો પડયો હોવાની ચર્ચા થઈ રહી છે.
શિવસેનાએ ધારાસભ્ય સદાસરવણકર પર ફાયરીંગનો આરોપ કર્યો છે.સરવણકરે પ્રભાદેવી જંકશન પાસે પ્રથમ ગોળી ચલાવી હતી.તો બીજીવાર દાદર પોલીસ સ્ટેશન પાસે ફાયરીંગ કરી હોવાનો દાવો કરવામાં આવ્યો હતો.પોલીસે આ આરોપીની તપાસ શરૂ કરી છે. પોલીસે ધારાસભ્ય સદા સરવણકર,સમાધાન સરવણકર,સંતોષ તેલવણે અને અન્ય કાર્યકર્તા સામે કેસ દાખલ કર્યો છે.
વિધાનસભ્ય સદા સરવણકર પાસે પિસ્તોલ અને કારતૂસ છે કે કેમ તેની માહિતી પોલીસ મેળવી રહી છે.પોલીસ ઘટનાસ્થળની આસપાસના પરિસરના સીસીટીવી ફુટેજની તપાસણી કરી રહી છે.ફાયરિંગ થયાનું કન્ફર્મ થશે તો આર્મ્સ એક્ટની કલમો હેઠળ પણ ગુનો દાખલ કરવામાં આવશે.
