નવી દિલ્હી : રિલાયન્સ ઈન્ડસ્ટ્રીઝના ચેરમેન અને મેનેજિંગ ડિરેક્ટર મુકેશ અંબાણી એશિયાના સૌથી ધનવાન વ્યક્તિ બની ગયા છે.આ રીતે તેઓ અદાણી ગ્રુપના ચેરમેન ગૌતમ અદાણીથી આગળ નીકળ્યા છે. રિલાયન્સ ઈન્ડસ્ટ્રીઝના શેરમાં તેજી જોવા મળી હતી જેને કારણે તેમની સંપત્તિમાં વધારો થયો હતો.બ્લૂમબર્ગ બિલિયોનેર્સ ઈન્ડેક્સ મુજબ મુકેશ અંબાણીની નેટવર્થ 99.7 અબજ ડોલર થઈ છે.2022માં તેમની સંપત્તિમાં 9.69 બજ ડોલરનો વધારો થયો છે.સમગ્ર વિશ્વના ધનવાનોની યાદીમાં મુકેશ અંબાણી આઠમા ક્રમે રહ્યા છે.
ગૌતમ અદાણી એશિયાના બીજા ક્રમના સૌથી ધનવાન વ્યક્તિ બન્યા છે જેમની સંપત્તિ 98.7 અબજ ડોલર છે.વિશ્વના ધનવાનોની યાદીમાં તેઓ નવમા ક્રમે છે.રિલાયન્સ ઈન્ડસ્ટ્રીઝનો શેર છેલ્લાં એક સપ્તાહમાં 6.79 ટકા ઉછળી ગયો છે.2022ના કેલેન્ડર વર્ષમાં તેનો શેર 16.61 ટકા વધ્યો છે.છેલ્લાં એક વર્ષમાં રિલાયન્સના શેરમાં રોકાણકારોને 27 ટકા વળતર મળ્યું છે.રિલાયન્સે તાજેતરમાં કેટલાક એક્વિઝિશન કર્યા છે જેને કારણે તેનો શેર લાઈમલાઈટમાં છે.
રિલાયન્સે અમેરિકાની એપોલો ગ્લોબલ મેનેજમેન્ટે વોલગ્રીન્સ બૂટ્સ એલાયન્સ ઈન્કના ઈન્ટરનેશનલ કેમિસ્ટ અને ડ્રગસ્ટોર યુનિટ્સ ખરીદવા માટે હાથ મિલાવ્યા હોવાના અહેવાલ હતા.આ ઉપરાંત રિલાયન્સે હેમ્લીઝ,ક્લોવિયા,મિલ્કબાસ્કેટ,અર્બન લેડર,હેપ્ટિક જેવી કંપનીઓમાં રોકાણ કર્યું છે.તેણે ડ્રીમ પ્લાસ્ટ નામની ઈટાલી સ્થિત પ્લાસ્ટિક લેગ્નોનો ભારત ખાતેનો મેન્યુફેક્ચરિંગ બિઝનેસમાં પણ 40 ટકા હિસ્સો ખરીદવાની જાહેરાત કરી છે.એજ્યૂટેક સ્ટાર્ટઅપમાં પણ તેણે રોકાણ કર્યું છે.દરમિયાન ફોર્બ્સની રિયલ-ટાઈમ બિલિયોનેર્સની યાદી મુજબ મુકેશ અંબાણી 104.7 અબજ ડોલરની સંપત્તિ ધરાવે છે,જ્યારે ગૌતમ અદાણી એન્ડ ફેમિલીની સંપત્તિ 99.9 અબજ ડોલર છે.આ યાદી મુજબ વિશ્વના ધનવાનોની યાદીમાં અંબાણી છઠ્ઠા ક્રમે છે.તેમની સંપત્તિ 6.21 ટકા એટલે કે 6.1 ટકા વધી છે.ગૌતમ અદાણીની સંપત્તિ 0.66 ટકા વધી છે અને તેઓ આ યાદીમાં નવમા ક્રમે છે.
