આગમાં કોઈ જાનહાનિ થઈ નહીં,પણ લાખો રૂપિયાની માલમતાને નુકસાન થયું:જોકે હાઇકો સુપરમાર્કેટ અને વેસ્ટસાઇડ જેવા અનેક શોરૂમ ગઈ કાલે બંધ રહ્યા પવઈના હીરાનંદાનીમાં આવેલા હાઇકો મૉલની ત્રીજા માળની ઑફિસમાં ગઈ કાલે વહેલી સવારે પાંચ વાગ્યે શૉર્ટ-સર્કિટને કારણે આગ ફાટી નીકળી હતી.જોકે આ મૉલના સિક્યૉરિટી ગાર્ડ્સ રાકેશ દુબે, અનંત નાગ અને અજય મ્હાત્રેએ સમયસર તેમણે લીધેલી આગ ઓલવવાની ટ્રેઇનિંગનો ઉપયોગ કરતાં મૉલના ફક્ત ઉપરના ભાગને જ નુકસાન થયું હતું.
આમ છતાં આ મૉલમાં આવેલી હાઇકો સુપરમાર્કેટ, વેસ્ટસાઇડ જેવા અનેક શોરૂમ ગઈ કાલે બંધ રહ્યા હતા.આ આગમાં કોઈ જાનહાનિ થઈ નહોતી, પરંતુ લાખો રૂપિયાની માલમતાને નુકસાન પહોંચ્યું હતું.આગ બાબતની માહિતી આપતાં આ મૉલના જ પરિસરમાં આવેલી એક થ્રી-સ્ટાર હોટેલના સિક્યૉરિટી ગાર્ડે‘મિડ-ડે’ને કહ્યું હતું કે‘ગઈ કાલે સવારે પાંચ વાગ્યાની આસપાસ ત્રીજા માળની ઑફિસમાંથી ધુમાડા નીકળવાની શરૂઆત થઈ હતી.જોકે મૉલના સિક્યૉરિટી ગાર્ડ્સ તરત જ સાવધાન થઈ ચૂક્યા હતા.
તેમની સાથે અમારી હોટેલની સિક્યૉરિટી અને અન્ય સિક્યૉરિટી પણ આગ ઓલવવા માટે સક્રિય બની ગઈ હતી.તેમણે તરત જ ફાયર ફાઇટિંગ સિસ્ટમની મદદથી આગ ઓલવવાની શરૂઆત કરી દીધી હતી.અમારી હોટેલમાંથી તરત જ ફાયર બ્રિગેડને ફોન કરીને આગની જાણકારી આપવામાં આવી હતી.નજીકની વિક્રોલી ફાયર બ્રિગેડ ઘટનાસ્થળે પહોંચે એ પહેલાં જ પવનને લીધે આગે વિકરાળ સ્વરૂપ પકડી લીધું હતું.એને કારણે ફાયર બ્રિગેડે આવીને બે કલાકની ભારે જહેમત પછી આગને કન્ટ્રોલમાં લીધી હતી.ત્રીજા માળે લાગેલી આગને કારણે આસપાસના શોરૂમને પણ નુકસાન થયું છે.’
