થિરુવનંતપુરમ, તા.૧૧ : કર્ણાટકમાં સ્કૂલ-કોલેજોમાં હિજાબ પહેરવાનો વિવાદ ચાલી રહ્યો છે એવા સમયમાં કેરળના રાજ્યપાલ આરિફ મોહમ્મદ ખાને શુક્રવારે જણાવ્યું હતું કે, ઈતિહાસ પર નજર કરીએ તો ઈસ્લામની પહેલી પેઢીએ જ હિજાબ પહેરવાનો ઈનકાર કરી દીધો હતો.તેમણે કહ્યું કે મારી વાત સાબિત કરવા હું મોહમ્મદ પયગંબરની સંબંધીની જ એક કથા કહું છું, જેણે હિજાબને ફગાવી દીધો હતો.તેમણે કથાને ટાંકતા ઉમેર્યું કે, આ હું નથી કહેતો, ઈતિહાસ કહે છે. મોહમ્મદ પયગંબરના ઘરમાં જ ઉછરેલી એક યુવતી,જે મોહમ્મદ પયગંબરનાં પત્નીની સંબંધી હતી તે ખૂબ જ સુંદર હતી.મધ્યયુગના સમયમાં કુફાના ગવર્નર તેના પતિએ મહિલાને હિજાબ નહીં પહેરવા બદલ ઠપકો આપ્યો ત્યારે તેણે કહ્યું, હું ઈચ્છું છું કે લોકો મારી સુંદરતા જુએ અને મારા પર અલ્લાહની મહેર થઈ છે અને તે બદલ હું અલ્લાહનો આભાર માનું છું.આમ, ઈસ્લામની પહેલી પેઢીએ જ હિજાબ પહેરવાનો ઈનકાર કરી દીધો હતો. આરિફ ખાને કહ્યું કે, હું બસ આટલું જ કહેવા માગું છું.
મોહમ્મદ પયગંબરની સંબંધીએ જ હિજાબ ફગાવી દીધો હતો : આરિફ ખાન
