રૂ 10,000 કરોડથી વધુના કેપિટલ ઈન્ફ્યૂઝન પછી બેન્કને બચાવી લેવાશેઃ પ્રશાંતકુમાર
એજન્સી > મુંબઈ
યસ બેન્કે અંતે ડિસેમ્બરના ક્વાર્ટરના પરિણામ જાહેર કર્યા છે. બેન્કની ખોટ આ ત્રિમાસિક ગાળામાં ~18,654 કરોડ થઈ હતી. યસ બેન્કે સંકેત આપ્યો છે કે 2020-21માં પણ સમસ્યા ચાલુ રહેશે. યસ બેન્કે આ સાથે સ્પષ્ટ કર્યું છે કે ~8500 કરોડથી વધુના ટિયર-1 બોન્ડ્સ સંપૂર્ણપણે માંડવાળ કરી દેવાશે. જોકે નવા નિયુક્ત થયેલા સીઈઓ પ્રશાંતકુમારે વિશ્વાસ વ્યક્ત કર્યો હતો કે ~10,000 કરોડથી વધુના કેપિટલ ઈન્ફ્યૂઝન પછી બેન્કને બચાવી લેવાશે.
યસ બેન્કમાંથી છેલ્લાં છ મહિનામાં ~72,000 કરોડની ડિપોઝીટ પાછી ખેંચી લેવાઈ છે. કુલ ~1.37 લાખ કરોડની ડિપોઝીટ હતી, જેમાંથી આટલો ઘટાડો થઈ ગયો છે. પ્રશાંતકુમારે કહ્યું હતું કે પ્રસ્તાવિક કેપિટલ ઈન્ફ્યૂઝન અને યસ બેન્કના મજબૂત કસ્ટમર બેઝ તથા બ્રાન્ચ નેટવર્કને કારણે નજીકના ભવિષ્યમાં તેનો બિઝનેસ રાબેતા મુજબનો ચાલશે અને તેની એસેટ્સ મજબૂત બનશે. બેન્ક તેની લાયેબિલિટી પૂરી કરશે. યસ બેન્ક બુધવારે મોરેટોરિયમમાંથી બહાર આવી જશે એટલે પ્રસાંતકુમાર તેના સીઈઓ તરીકેનો ચાર્જ સંભાળી લેશે.
યસ બેન્કે આ ઉપરાંત કહ્યું હતું કે ડિસેમ્બરના ક્વાર્ટરમાં તેનું સ્લિપેજ વધીને ~24,587 કરોડ થઈ ગયું હતું, જે 2021-22માં સામાન્ય થશે. 2020-21માં સ્લિપેજ કુલ એસેટ્સના 5 ટકા રહેવાની ધારણા છે. ડિસેમ્બર 2019ના અંતે બેન્કની એસેટ્સ 22 ટકા ઘટીને ~2.90 લાખ કરોડની થઈ હતી. તેની કોર નેટ ઈન્ટરેસ્ટ ઈન્કમ 60 ટકા ઘટીને ~1065 કરોડ થઈ હતી. વધુ સ્લિપેજ અને લોન બુકમાં ઘટાડાને કારણે આમ થયું હતું. નેટ ઈન્ટરેસ્ટ માર્જિન ઘટીને 1.4 ટકા થઈ ગયું હતું, જે એક વર્ષ પહેલાં 3.3 ટકા હતું. યસ બેન્કે હવે રિટેલ અને સ્મોલ બિઝનેસ લોન પર ફોકસ કરવાનું નક્કી કર્યું છે. પ્રશાંતકુમારે કહ્યું હતું કે યસ બેન્ક હવે ડિપોઝીટ વધારવા, સ્ટ્રેસ્ડ એસેટ્સનો ઝડપી ઉકેલ લાવવા અને ખર્ચ ઘટાડવા જેવા પગલાં પર ફોકસ કરશે. હાય વેલ્યૂ લોન સેગમેન્ટમાં હાલમાં જે સ્થિતિ છે તેમાં કોમર્શિયલ રિયલ્ટી, નોન-બેન્કિંગ ફાઈનાન્શિયલ કંપનીઓને ધિરાણ, હાઉસિંગ ફાઈનાન્સ કંપનીઓને ધિરાણ, ઈન્ફ્રાસ્ટ્રક્ચર, ઈલેક્ટ્રિસિટી સેક્ટરને ધિરાણમાં ઘટાડો કરવામાં આવશે.
