નવી િદલ્હી : અમેરિકાના પૂર્વ વિદેશમંત્રી હેનરી કિસિંજરે યુક્રેન અને રશિયા વચ્ચેના યુદ્ધને લઈને વિવાદિત નિવેદન કર્યું છે.તેમણે કહ્યું કે પશ્ચિમ જેટલું એમાં આગળ વધશે,એટલું એમાં ફસાતું જશે.આ સાથે યુક્રેને યુદ્ધ રોકવા માટે રશિયાને પોતાની કેટલીક જમીન આપી દેવી જોઈએ.જેને લઈને હવે યુક્રેનના રાષ્ટ્રપતિ વ્લાદિમીર ઝેલેન્સ્કીએ આકરા શબ્દોમાં પોતાની વાત રજૂ કરી છે.ઝેલેન્સ્કીએ કહ્યું કે રશિયા ગમે તે કરે,પરંતુ અમે અમારી જમીન આપીશું નહીં.તેમણે કિસિંજરના પ્લાનની સરખામણી 1938ના અપીસમેન્ટ એગ્રીમેન્ટ સાથે કરી,જેમાં યુદ્ધથી બચવા માટે બ્રિટને હિટલરને પોતાના ક્ષેત્રમાં આગળ વધવા મંજૂરી આપી હતી,જેને એક ખૂબ નબળી નીતિ માનવામાં આવે છે.
હેનરી કિસિંજરે જણાવ્યું કે યુક્રેને રશિયા સાથે વાતચીત કરવી જોઈએ,કારણ કે એક સમયે જ્યારે તણાવ વધી જશે તો રશિયા સામે યુક્રેન નબળું હશે અને પછી વાતચીત શક્ય બની શકશે નહીં.આ સાથે હેનરી કિસંજરે કહ્યું કે,આદર્શ રૂપ તો એ છે કે બોર્ડર પર પહેલા જેવી સ્થિતિ થાય.કારણ કે યુક્રેને આગળ વધવું જોઈએ નહીં,કારણ કે આ પગલું સીધી રીતે રશિયા વિરુદ્ધ યુદ્ધની જાહેરાત સમાન માનવામાં આવશે. પોતાના હિતને જોતા યુક્રેને પોતાની જમીનનો થોડોક ભાગ રશિયાને આપી દેવો જોઈએ.કિસિંજરના નિવેદનના અનુસંધાનમાં ઝેલેન્સ્કીએ કહ્યું કે,એ બાબતથી અમને કોઈ ફરક પડતો નથી કે રશિયા શું કરે છે. દાવોસમાં આ વર્ષે પણ ફક્ત હિતની વાત કરવામાં આવી રહી છે,એ પણ ત્યારે,જ્યારે રશિયાની હજારો મિસાઈલ યુક્રેન પર પડી છે.યુક્રેનના હજારો નાગરિક માર્યા ગયા છે.બૂચા અને મારિયોપોલની ભયાનક ઘટના પછી પણ આ પ્રકારની સલાહ આપવામાં આવી રહી છે.અમારા શહેર નષ્ટ થઈ ગયા.રશિયાએ ફિલ્ટરેશન કેમ્પ બનાવી રાખ્યા છે,જ્યાં રશિયન આર્મી યુક્રેનના લોકોને પ્રાણીઓની જેમ મારી રહી છે.
