નવી દિલ્હી : માઇક્રો બ્લોગિંગ પ્લેટફોર્મ ટ્વિટર પર તેના યુઝર્સની પ્રાઇવસી ભંગ કરવાનો આરોપ મુકાયો છે.જેના કારણે તેના પર ૧૫ કરોડ ડોલર(આશરે ~૧,૨૦૦ કરોડ)નો દંડ ફટકારાયો છે.ટ્વિટર પર દંડ ફટકારવાની સાથે જ કંપનીને પોતાના યુઝર્સની ડેટાની સલામતી માટે માપદંડ તૈયાર કરવાની આકરી સૂચના આપવામાં આવી છે.યુએસ ડિપાર્ટમેન્ટ ઓફ જસ્ટિસ એન્ડ ફેડરેલ ટ્રેડ કમીશને ટ્વિટર સાથેના કેસના ઉકેલની જાહેરાત કરી હતી.રેગ્યુલેટર્સનો આરોપ છે કે ટ્વિટરે યુઝર્સને અંધારામાં રાખીને ૨૦૧૧ના એફટીસીના આદેશનું ઉલ્લંઘન કર્યું હતું.
અમેરિકાની સરકારે આક્ષેપ કર્યો છે કે મે ૨૦૧૩થી સપ્ટેમ્બર ૨૦૧૯ સુધી ટ્વિટરે યુઝર્સને જણાવ્યું હતું કે તે ખાતાની સલામતીના હેતુથી તેમના ફોન નંબર અને ઇમેલનું સરનામું એકત્ર કરી રહ્યું હતું.પરંતુ કંપનીએ યુઝર્સના ડેટા અને તેમની પર્સનલ વિગતોને અન્ય કંપનીઓ સાથે શેર કરી હતી.આ ડેટાનો ઉપયોગ કરીને કંપનીઓ યુઝર્સને ઓનલાઇન જાહેરાત મોકલવા લાગી હતી.રેગ્યુલેટર્સે એક સંઘી કેસમાં એવો પણ આરોપ મુક્યો હતો કે ટ્વિટરે ખોટા દાવા કર્યા છે કે તેણે યૂરોપીય સંઘ અને સ્વિત્ઝર્લેન્ડની સાથે અમેરિકી ગુપ્તતાની સમજૂતીનું અનુપાલન કર્યું છે.આ કેસના ઉકેલ બાદ ટ્વિટર પર ૧૫ કરોડ ડોલરનો દંડ ફટકારાયો હતો.
