અમદાવાદ, સોમવાર : રૃપાણી સરકારની વિદાય બાદ રચાયેલી નવી ભાજપ સરકારને હજુ એકાદ વર્ષ માંડ થયુ છે ત્યાં બે સિનિયર મંત્રી રાજેન્દ્ર ત્રિવેદી અને પૂર્ણેશ મોદી પાસેથી ખાતા છિનવી લેવાયા છે.હવે લોકોમાં એક જ સવાલ ઉઠયો છે કે, એવુ તો શું થયુ કે, અચાનક જ ખાતા લઇ લેવાયા… તેનુ કારણ શું…..
પૂર્ણેશ મોદી પાસેથી માર્ગ મકાન વિભાગ લઇ લેવા પાછળના કારણો…
– તૂટેલા રોડ વિશે બેજવાબદાર નિવેદન, સરકારની પ્રતિષ્ઠા ખરડાઇ
– ભાજપની ના હોવા છતાંય સત્તાવાર પીએને બદલે માનિતા પીએ મહેશ લાડ પાસે વિભાગના કામો કરાવ્યાં
– એસટીમાં ડ્રાઇવર-કંડક્ટરની બદલીઓમાં મનમાની ચલાવી
– માર્ગ મકાન વિભાગની નબળી કામગીરી
– ભાજપના ટોપના નેતાઓ સાથે સીધો ટકરાવ
– પક્ષ દ્વારા થતી ભલામણોનો ઇન્કાર
– વ્યક્તિગત એપ બનાવી સરકારને બદલે પોતાની લોકપ્રિયતા મેળવવી
બન્ને મંત્રીઓ ચર્ચામાં રહી ચૂક્યાં છે…
રાજ્ય કેબિનેટની બેઠકના બે મંત્રીઓના વિભાગો છીનવી લેવાયા છે ત્યારે આ બન્ને લોકો વચ્ચે
ચર્ચાનું કેન્દ્ર બનેલા છે.મહેસૂલ મંત્રી તરીકે રાજેન્દ્ર ત્રિવેદીએ જિલ્લા કલેક્ટર ઓફિસોમાં જઇને સરપ્રાઇઝ વિઝિટ લીધી છે અને કેટલાય ઓફિસરોની બદલી કરી તેમની સામે પગલાં લીધા છે, જ્યારે માર્ગ-મકાન વિભાગના મંત્રી પૂર્ણેશ મોદીએ ગુજરાતના માર્ગોમાં ખાડા પૂરવા તેમજ તૂટેલા માર્ગોના સમારકામ માટે પોતાની એપ્લિકેશન બનાવી લોકોને ફરિયાદો કરવાનું જણાવ્યું છે.
હાઇકમાન્ડના ઇશારે ફેરફારનો નિર્ણય…
ગુજરાતની કેબિનેટમાં એવા ઘણાં મંત્રીઓ છે કે જેઓ તેમના વિભાગમાં નિરૂત્સાહી જોવા મળે છે.પોતાના વિભાગોનું પરફોર્મન્સ તેઓ આપી શકતા નથી.કેબિનેટની છેલ્લી બેઠકમાં મુખ્યમંત્રીએ તેમના સાથી સભ્યોને પરફોર્મન્સ આપવાની તાકીદ કરી હતી, જેના ભાગરૂપે મંત્રીઓના વિભાગોમાં આ ફેરબદલ કરવામાં આવ્યો હોવાનું કહેવાય છે.વિધાનસભાની ચૂંટણી આવતી હોવાથી હાઇકમાન્ડના ઇશારે આ ફેરફાર કરવામાં આવ્યો હોય તેવું પણ ચર્ચાઇ રહ્યું છે.અચાનક વિભાગો છીનવાઇ જતાં કેબિનેટના અન્ય સભ્યોને પણ ફાળ પડી છે.
ભુપેન્દ્ર પટેલના મંત્રીમંડળમાં સૌથી સિનિયર એવા, એક સમયે રાજ્યની વિધાનસભામાં અધ્યક્ષપદે રહી ચુકેલા રાજેન્દ્ર ત્રિવેદીને રાજ્યનું નાણા સિવાયનું સૌથી મહત્વનું મહેસૂલ ખાતું આપવામાં આવ્યું હતું.ત્રિવેદીએ મંત્રી તરીકે લોકોની સુખાકારી વધે,દરેક નાગરીકોને પોતાના જમીન અંગેના હક્ક માટે વિવાદો માટે જીલ્લા કલેકટર પાસે લોક અદાલત શરુ કરી સ્થળ ઉપર જ પ્રશ્નોના નિકાસ માટે હિમાયત કરી હતી.આ ઉપરાંત મંત્રી તરીકે મહેસૂલ વિભાગમાં ભ્રષ્ટાચાર અટકે તે માટે વિવિધ રજીસ્ટ્રાર કચેરીએ દરોડા પાડી કામગીરી પારદર્શી બનવા માટે પ્રયત્ન કર્યા હતા.
બીજી તરફ, પુર્ણેશ મોદી અગાઉ રાજ્ય વિધાનસભામાં દંડક તરીકે કામગીરી કરી હતી.તેમણે મોબાઈલ એપના સ્વરૂપમાં રસ્તા તૂટ્યા હોય કે રસ્તા અંગે કોઈ ફરિયાદ હોય તેના માટે કામગીરી શરુ કરી હતી.પરંતુ, આ મોબાઈલ એપ સરકારના વિભાગના બદલે તેમણે અંગત નામે એપ લોન્ચ કરી હતી.આ પગલું તેમના વિરુદ્ધ ગયું હોય એવી શક્યતા છે.
