નવી દિલ્હી, તા. 28 ફેબ્રુઆરી, 2022, સોમવાર : યુક્રેન સામે યુદ્ધની જાહેરાતથી માત્ર યુક્રેનને જ મસમોટું નુકશાન નથી થઈ રહ્યું.મહાસત્તા રશિયાને પણ આર્થિક મોરચે હવે નુકશાન થઈ રહ્યું છે. SWIFTમાંથી બાકાત અને પ્રોજેક્ટો રદ્દ સહિતના અનેક પ્રતિબંધો લદાતા રશિયાના ચલણમાં ડોલરની સામે મસમોટો ઘટાડો જોવા મળી રહ્યો છે.
ગત સપ્તાહના ગુરૂવારના કડાકા અને શુક્રવારના રીબાઉન્ડ બાદ આજે ફરી નવા સપ્તાહના નવા સત્રમાં રશિયન કરન્સીમાં મસમોટું ગાબડું જોવા મળી રહ્યું છે.રશિયન રૂબેલ ડોલરની સામે સોમવારના શરૂઆતી સત્રમાં 41%ના કડાકે 117 પ્રતિ યુએસ ડોલરના લેવલ સુધી ગગડ્યો હતો.
જોકે, બાદમાં સેન્ટ્રલ બેંકની એક જાહેરાતને પગલે તેમાં સુધારો જોવા મળ્યો છે.રશિયન ચલણના ઘસારાને અટકાવવા,વિદેશમાંથી પરત ખેંચાતા ફંડને અટકાવવવા માટે સેન્ટ્રલ બેંકે સોમવારે જાહેરાત કરી હતી કે તે દેશના મુખ્ય વ્યાજદરને 9.5 ટકાથી વધારીને 20 ટકા કરી રહી છે.
રશિયન સેન્ટ્રલ બેંકના આ નિર્ણય બાદ રશિયાની કરન્સી રૂબેલ સુધરીને 99 ડોલરના સ્તરે આવ્યો છે પરંતુ આજના દિવસમાં હજી પણ 20%નો કડાકો રશિયન રૂબેલમાં જોવા મળી રહ્યો છે.
