- મંત્રીની ભત્રીજીની ઓળખ આપી યુવતીએ બાર ઉમેદવાર પાસેથી લાખો ઉઘરાવ્યા
રાજકોટ,તા.17 જાન્યુઆરી,સોમવાર : રાજકોટ શહેરમાં તાજેતરમાં લેવામાં આવેલી LRD અને PSIની ભરતી પ્રક્રિયામાં રૂપિયા લઇ પાસ કરાવવાનું કૌભાંડ સામે આવ્યું છે.શહેરમાં એક યુવતીએ પોતે એક મંત્રીની ભત્રીજી હોવાનું કહીને એક બે નહીં 12 જેટલા લોકોને પોતાના ઝાંસામાં ફસાવીને અંદાજે 15 લાખ જેટલા રૂપિયા પડાવ્યાં હોવાનું સામે આવ્યું છે.
ગાંધીગ્રામ પોલીસે ક્રિષ્ના ભરડવા તેમજ જેનિશ પરસાણા નામના બંટી-બબલીની ધરપકડ કરી છે.આરોપી ક્રિષ્ના ભરડવા તેમજ જેનિશ પરસાણા નામના બંટી-બબલીએ 12 જેટલા લોકોને કોઈપણ પરીક્ષા વિના સીધી ભરતીની લાલચ આપી હતી અને કુલ રૂ. 15 લાખ પડાવ્યા હતા.
ગાંધીગ્રામ પોલીસને આશિષ સિયારામ ભગતની ફરિયાદ મળી હતી જેના પર પોલીસે કાર્યવાહી કરીને બંને આરોપીઓને ઝડપી લઈ કાયદેસરની કાર્યવાહી હાથ ધરી છે.પોલીસના જણાવ્યા અનુસાર આરોપી ક્રિષ્ના ભરડવા નામની યુવતી પોતે મંત્રીની ભત્રીજી હોવાની ઓળખ આપતી હતી.તેમજ ભરતી બોર્ડમાં ડાયરેક્ટ કોન્ટેક્ટ હોવાનું કહીને તેણીએ જેનિશ પરસાણા સાથે મળી 10 લોકો પાસેથી રૂ.1.10 લાખ તેમજ અન્ય બે પાસેથી રૂ.4 લાખ મળી કુલ 15 લાખ ઉઘરાવ્યાં હતા.ભરતી માટેના લિસ્ટમાં નામ નહીં આવતા આશિષ સિયારામ ભગતે છેતરપિંડીની આશંકાએ ગાંધીગ્રામ પોલીસને જાણ કરી હતી.જેને લઈને પોલીસે ત્વરિત કાર્યવાહી કરી બંટી-બબલી વિદેશ ભાગે તે પહેલાં ઝડપી લીધા હતા.
હાલ પોલીસ દ્વારા આ મામલે આરોપી ક્રિષ્ના ભરડવા અને જેનિશની ધરપકડ થઈ છે.આ કૌભાંડ સમગ્ર સૌરાષ્ટ્રવ્યાપી હોવાનું પ્રાથમિક તપાસમાં લાગી રહ્યું છે.જેને લઈને ભરતી બોર્ડ વતી હસમુખ પટેલે ટ્વીટ કરીને માહિતી આપી હતી કે,આવી કોઇ પણ લાલચમાં આવવું નહી.આવી રીતે ભરતી શક્ય નથી.જે વ્યક્તિ પાસ થાય તે પોતાની મહેનત થકી જ સિલેક્ટ થઇ શકશે.
આરોપીએ ત્રણ યુવતી સહિત 12 ઉમેદવારો પાસેથી પોલીસ ભરતીના નામે રૂપિયા ખંખેર્યા હતા.નાણાં આપનાર ઉમેદવારો ઓનલાઇન પરિણામમાં ફેઈલ થતા પોલીસનો સંપર્ક કર્યો હતો.ઉલ્લેખનીય છે કે ગુજરાતમાં હાલ ભરતી ભ્રષ્ટાચારનો અખાડો બની ચુકી હોય તેવું ચિત્ર બની રહ્યું છે અને એક પછી એક પેપર ફુટે છે.
