– દિલધડક કરતબો સાથે માતાજીની અનોખી આરાધના કરતો વિડિયો થયો વાયરલ
– રાજપૂત બહેનોનો તલવાર રાસ લોકોમાં આકર્ષણનું કેન્દ્ર બન્યો
નવરાત્રિનો પાવન પર્વ ચાલી રહ્યો છે.જેમાં વિવિધ રીતે માતાજીની આરાધના કરવામાં આવી રહી છે.રાજકોટના રાજવી પેલેસ ખાતે છેલ્લા 15 વર્ષથી નવરાત્રિમાં તલવાર રાસ રમાય છે.ત્યારે આ વખતે મંગળવાર અને બુધવાર એમ બે દિવસ એક સાથે 200 કરતા વધુ બહેનો દ્વારા ચાલુ બાઈકે તલવાર રાસનું આયોજન કરાયું હતું.જેમાં દિલધડક દ્રશ્યો સાથે માતાજીની અનોખી આરાધના જોવા મળી હતી.
આ અંગે રાણીસાહેબ કાદમ્બરીદેવીએ જણાવ્યું હતું કે, આ વખતે પેલેસમાં 15 વર્ષથી વધુ ઉંમરની એક સાથે 200 જેટલી રાજપૂત મહિલાઓ દ્વારા ચાલુ બાઈકે તલવાર રાસ રજૂ કરાયો હતો.આ વખતે નવીનતમ બાઈક પર દિલધડક તલવાર રાસનો સ્ટંટ કર્યો હતો.જેમાં જાનકીબા ઝાલા તેમજ જયશ્રીબા જાડેજાએ બાઈક પર અદભૂત તલવારબાજી કરીને લોકોને મંત્રમુગ્ધ કરી દીધા હતા.
વધુમાં તેમણે કહ્યું હતું કે, તલવાર રાસનું આયોજન રણજીત વિલાસ પેલેસમાં થયું છે.બહેનો દ્વારા જ આ ગરબાનું આયોજન કરવામાં આવે છે.દર વર્ષે અમે રાજપૂત સમાજની સંસ્કૃતિને જાળવવા માટે પ્રયાસ કરીએ છીએ.આ એક માતાજીના આરાધનાનું પ્રતિક છે.પરંપરા લુપ્ત થતી જાય છે તેને બચાવી રાખવા અમે આ આયોજન કરીએ છીએ. 200 જેટલી બહેનોએ તલવાર રાસની પ્રેક્ટિસ કરી હતી.ક્ષત્રિય સમાજ તો પરંપરાને જાળવી રાખવા માટે કામ કરે છે.આથી અમે ટ્રેડિશનલ રાસ જેમ કે, તાલી રાસ,થાલી રાસ,દીવડા રાસ,તલવાર રાસનો સમાવેશ થાય છે.
તલવાર રાસ રમનાર જાનકીબા ઝાલાએ જણાવ્યું હતું કે, બીજા નોરતે ભગિની ફાઉન્ડેશન દ્વારા અહીં રાસ-ગરબાનું આયોજન થયું છે.જેમાં અમે 15 વર્ષથી અમે તલવાર રાસ કરીએ છીએ.બહારના રાસમાં જોઈએ તો ખોટી તલવાર હોય છે જ્યારે અમે અસલી તલવાર સાથે રાસ લઈએ છીએ. જેનું વજન એક કિલો જેવું હોય છે.દરેક દીકરી બે-બે તલવાર સમણે છે.તલવાર રાસ શીખડાવવા માટે અમને થોડી મહેનત થાય છે.જોકે તલવાર સમણવી અમારા સમાજની દીકરીઓના લોહીમાં છે.તલવાર રાસ શીખવામાં 10 દિવસ જેવો સમય લાગતો હોવાનું પણ તેમણે કહ્યું હતું.
ઉલ્લેખનીય છે કે, ભગીની સેવા જ્ઞઉન્ડેશનના પ્રમુખ બિંદુબા રાણા અને ખજાનચી મમતાબા ગોહિલ સહિતની કારોબારી ટીમ દ્વારા કરાયું છે.તેઓ મિડીયા સાથેની વાતચીતમાં જણાવ્યું હતુ કે, તલવાર રાસ તો જોનારાઓને અનોખો જ લાગ્યો હતો.આ સાથે જ સાફ્ટ બાંધવાની તાલીમથી માંડીને હેરિટેજ વોક,પર્યાવરણ જાગૃતિ,ઈકો ફ્રેન્ડલી રાખડી બનાવીને સૈનિકોને મોકલવી વગેરે પ્રવૃત્તિઓ ભગિની ફાઉન્ડેશન દ્વારા બાઈક પરનો તલવાર રાસ શીખવવા માટે ખાસ શિબિર રાખવામાં આવી હતી.
