– આઠ વિધાનસભા બેઠકની મતગણતરી શાંતિપૂર્ણ વાતાવરણમાં શરૂ થઈ ચૂકી
– મત ગણતરીની શરૂઆત પોસ્ટલ બેલેટથી થઈ હતી
રાજકોટ : ગુજરાત રાજ્યમાં બે તબક્કામાં યોજાયેલ વિધાનસભા સામાન્ય ચૂંટણી ૨૦૨૨ની મતગણતરીની પ્રક્રિયા શરૂ કરવામાં આવી છે.જે અન્વયે રાજકોટ જિલ્લામાં સરકારી ઈજનેરી કોલેજ,કણકોટ ખાતે જિલ્લા ચૂંટણી અધિકારી અરુણ મહેશ બાબુ તેમજ અન્ય અધિકારીઓ ઉપરાંત ઉમેદવારોની ઉપસ્થિતિમાં મતગણતરી શરૂ કરવામાં આવી છે.જેમાં પ્રથમ રાઉન્ડ બાદ ભાજપનાં રાદડિયા,બાવળીયા અને દર્શીતા શાહ આગળ છે.તો કોંગ્રેસનાં વિધાનસભા-68 ઉમેદવાર ઈન્દ્રનીલ રાજગુરુ આગળ ચાલી રહ્યા છે.
જાણવા મળતી વિગત મુજબ, ઉમેદવારોની હાજરીમાં નિયમોના ચુસ્ત પાલન સાથે આઠ વિધાનસભા બેઠકની મતગણતરી શાંતિપૂર્ણ વાતાવરણમાં શરૂ થઈ ચૂકી છે.મતગણતરીમાં ભાગ લેનાર અધિકારી- કર્મચારીઓએ લોક પ્રતિનિધિત્વ ધારા હેઠળ મતદાન માટેની ગુપ્તતા જાળવવાના શપથ ગ્રહણ કર્યા હતા.મત ગણતરીની શરૂઆત પોસ્ટલ બેલેટથી થઈ હતી.પોસ્ટલ બેલેટની ગણતરી બાદ અંદાજિત અડધા કલાકમાં ઇ.વી.એમ. ના મતગણતરી શરૂ થશે.હાલ પોસ્ટલ બેલેટ ગણતરી દરમિયાન કુલ 8 બેઠક પૈકી 7 બેઠકમાં ભાજપ આગળ હોવાનું જાણવા મળી રહ્યું છે.
જસદણ વિધાનસભા વિસ્તારમાં બીજા રાઉન્ડના અંતે આમ આદમી પાર્ટી બીજા નંબરે ભાજપ પ્રથમ નંબરે અને કોંગ્રેસ ત્રીજા નંબરે છે.રાજકોટમાં દક્ષિણ વિધાનસભા પર બીજા રાઉન્ડના અંતે ભારતીય જનતા પાર્ટીના ઉમેદવાર રમેશ ટીલાળાં 5,000 મતથી આગળ છે. ગોંડલ બેઠક પર સતત બીજા રાઉન્ડમાં ભાજપ આગળ છે.ભાજપના ઉમેદવાર ગીતાબા જાડેજા 6200 મતથી આગળ છે જ્યારે ગ્રામ્ય બેઠક પર સતત બીજા રાઉન્ડમાં ભાજપના ઉમેદવાર ભાનુબેન બાબરીયા આગળ છે.
