મહેસાણા, તા. 05 માર્ચ, 2022, શનિવાર : રાજ્યમાં પ્રથમ વખત એક સાથે 1,200થી પણ વધારે લોકોને ફુડ પોઈઝનિંગ થયું હોવાની ઘટના બની છે.મહેસાણા જિલ્લામાં આવેલા વિસનગર તાલુકાના સવાલા ગામ ખાતે 1,200થી પણ વધારે લોકો ફુડ પોઈઝનિંગનો ભોગ બન્યા છે.કોંગ્રેસી નેતા વઝીરખાન પઠાણના ઘરે લગ્ન પ્રસંગ દરમિયાન આ પ્રકારની ઘટના બની હતી.
લગ્નમાં નોનવેજ ખાનારાઓ માટે ખાસ સમારંભ હતો જેમાં ભોજન કર્યા બાદ આટલી મોટી સંખ્યામાં લોકો ફુડ પોઈઝનિંગનો શિકાર બન્યા હતા.બાળકો, મહિલાઓ અને વૃદ્ધો સહિત સૌ કોઈને તાત્કાલિક સારવાર માટે જિલ્લાની મહેસાણા,વિસનગર અને વડનગર હોસ્પિટલ્સમાં દાખલ કરવામાં આવ્યા હતા.એક સાથે આટલી મોટી સંખ્યામાં લોકોને ફુડ પોઈઝનિંગ થતાં જિલ્લા વહીવટી તંત્ર દોડતું થઈ ગયું હતું.
આ અંગેની જાણ થતાં જ વિસનગરના ધારાસભ્ય સભ્ય અને રાજ્યના આરોગ્યમંત્રી ઋષિકેશ પટેલ તરત જ ગાંધીનગરથી મોડી રાત્રે વિસરનગર દોડી ગયા હતા અને વિસનગર સિવિલ હોસ્પિટલ,વડનગર સરકારી હોસ્પિટલ અને નૂતન સહિતની વિવિધ હોસ્પિટલમાં જઈને સારવાર લઈ રહેલા દર્દીઓની મુલાકાત લઈ તેમના સ્વાસ્થ્ય અંગે માહિતી મેળવી હતી.
દાવત માટે મુંબઈના દિલ્હી દરબાર નામના કેટરર્સને ખાસ બોલાવવામાં આવ્યું હતું અને તેમના કર્મચારીઓ પણ ફુડ પોઈઝનિંગનો ભોગ બન્યા હતા.
આ ઘટના બાદ જિલ્લા કલેક્ટરે દર્દીઓની મુલાકાત લીધી હતી અને ફુડ પોઈઝનિંગની સારવાર બાદ આશરે 95 ટકા લોકોને હોસ્પિટલમાંથી રજા આપી દેવાઈ હતી.
