મુંબઈ : રિલાયન્સ ઇન્ડસ્ટ્રીઝ નવી વિદેશી લોન દ્વારા ૧.૫ અબજ ડોલરનું ભંડોળ એકત્ર કરવાની યોજના ધરાવે છે. મહિનાની અંદર ફેસબૂક અને અન્ય બે રોકાણકારો પાસેથી લગભગ ~૬૧,૦૦૦ કરોડનું ભંડોળ એકત્ર કરનારી આ કંપની ભંડોળનો ઉપયોગ મૂડી ખર્ચ માટે કરશે.સૂત્રોના જણાવ્યા અનુસાર પાંચ વર્ષ માટે ભંડોળ એકત્ર કરવા સિન્ડિકેશનની પ્રક્રિયા ચાલુ હોવાથી રિલાયન્સ જૂથ લગભગ ડઝન વિદેશી ધિરાણકારો સાથે વાટાઘાટ કરી રહ્યું છે. ભંડોળનો ઉપયોગ રિલાયન્સના રિટેલ, પેટ્રોકેમિકલ્સ અને ઓઇલ-ગેસ સહિતના નોન-ડિજિટલ બિઝનેસના મૂડી ખર્ચની નિયમિત જરૂરિયાતો પૂરી કરવા થશે.સૂત્રએ જણાવ્યું હતું કે, “ભંડોળ એકત્ર કરવાની વાટાઘાટ થોડા સપ્તાહ પહેલાં શરૂ થઈ હતી.સિન્ડિકેશન પ્રોગ્રામના વિસ્તરણને પગલે લોનનો આંકડો વધીને લગભગ ૩૦ કરોડ ડોલરે પહોંચ્યો છે.”
લોનનો દર છ મહિનાના ડોલર આધારિત લંડન બેઝ્ડ લંડન ઇન્ટરબેન્ક બોરોઇંગ રેટ (LIBOR)માં ૨.૨૫-૨.૫ ટકાનો ઉમેરો કર્યા પછી નિર્ધારિત કરાય તેવી શક્યતા છે.જોકે,લોનના હપતાના આધારે ધિરાણદર અલગઅલગ હોઈ શકે. હજુ તેનો આખરી નિર્ણય લેવાયો નથી.HSBC,બાર્કલેઝ,બેન્ક ઓફ અમેરિકા,ક્રેડિટ સ્યુઇસ,ANZ,ક્રેડિટ એગ્રિકોલ,MUFG, સ્ટાન્ડર્ડ ચાર્ટર્ડ અને સિટીગ્રૂપ સહિતની બેન્કો રિલાયન્સ માટે ભંડોળ એકત્ર કરવાની પ્રક્રિયામાં સામેલ છે.સૂત્રોના જણાવ્યા અનુસાર લગભગ ૧૩ બેન્કો અને નાણાંસંસ્થાઓ આ પ્રક્રિયા સાથે જોડાયેલી છે.
રિલાયન્સ માટે ભંડોળ એવા સમયે એકત્ર કરવામાં આવી રહ્યું છે જ્યારે કંપની ૭ અબજ ડોલરનો રાઇટ્સ ઇશ્યૂ લોન્ચ કરવાની છે અગાઉ એપ્રિલમાં ફેસબૂકે રિલાયન્સ જિયો પ્લેટફોર્મ્સનો ૯.૯ ટકા હિસ્સો ૫.૭ અબજ ડોલરમાં ખરીદ્યો હતો.તેના આધારે કંપનીનું મૂલ્ય ૬૫.૯૫ અબજ ડોલર આંકવામાં આવ્યું છે.એવી રીતે ગયા સપ્તાહે અમેરિકાના ટેક્નોલોજી ઇન્વેસ્ટર સિલ્વર લેક પાર્ટનર્સે જિયો પ્લેટફોર્મ્સનો ૧.૧૫ ટકા હિસ્સો ૭૪.૭ કરોડ ડોલરમાં ખરીદ્યો હતો.ચોથા ક્વાર્ટરમાં રિલાયન્સનું ચોખ્ખું ઋણ ~૧.૬૧ લાખ કરોડ હતું,જે અગાઉના વર્ષના સમાન ગાળામાં ~૧.૫૪ લાખ કરોડના સ્તરે હતું.
કંપનીએ આપેલી માહિતી અનુસાર રિલાયન્સ જિયો પ્લેટફોર્મ્સના હિસ્સાનું વેચાણ અને રાઇટ્સ ઇશ્યૂને પગલે રિલાયન્સ ઇન્ડસ્ટ્રીઝની બેલેન્સશીટ મજબૂત બનશે.કંપનીના પ્રેઝન્ટેશન પ્રમાણે કંપનીને ચાલુ કેલેન્ડર વર્ષમાં ~૧.૦૪ લાખ કરોડ મળવાનો અંદાજ છે.ઉલ્લેખનીય છે કે, કંપનીએ છેલ્લા ત્રણ સપ્તાહમાં ત્રણ અને પાંચ વર્ષની મેચ્યોરિટીના બોન્ડ્સ વેચી ~૧૧,૨૯૫ કરોડનું ભંડોળ એકત્ર કર્યું હતું.કંપની મંગળવારે બોન્ડ્સ ઇશ્યૂ દ્વારા વધુ ~૪,૫૦૦ કરોડ મેળવશે.
