। મુંબઈ ।
શુક્રવારે આખા વિશ્વમાં કોરોના વાઈરસના કેસ વધતા અને મૃત્યુઆંક ૧૦,૦૦૦ની ઉપર જતા તેમજ વૈશ્વિક ઈકોનોમીમાં મંદી વધવાનાં એંધાણને કારણે ફોરેક્સ માર્કેટમાં ગભરાટભર્યું વલણ ચાલુ રહ્યું હતું. ડોલર સામે રૂપિયો વધુ ૮ પૈસા ઘટયો હતો અને ૭૫.૨૦ની નવી નીચી સપાટીએ બંધ રહ્યો હતો. શુક્રવારે રૂપિયો ૭૪.૮૨નાં ઊંચા મથાળે ખુલ્યો હતો અને મજબૂત બનીને ૭૪.૭૨ની ઊંચી સપાટી બનાવી હતી પણ કોરોના ફીવરને કારણે સેન્ટિમેન્ટ ખરડાયું હતું અને ૮ પૈસા ઘટીને ૭૫.૨૦ની નવી નીચી સપાટીએ બંધ રહ્યો હતો. ગુરુવારે રૂપિયો ૭૫.૧૨ની કિંમતે બંધ રહ્યો હતો.
સેન્સેક્સ અને નિફ્ટીમાં જબરદસ્ત ઉછાળો
શુક્રવારે દેશનાં બંને મુખ્ય શેરબજારોમાં રોકાણકારોની બલ્લે બલ્લે રહી હતી. બીએસઈ સેન્સેક્સ ૧૬૨૭.૭૩ પોઈન્ટ કે ૫.૭૫ ટકા વધીને ૨૯૯૧૫. ૯૬ પોઈન્ટ પર બંધ રહ્યો હતો જ્યારે નિફ્ટી ૪૮૨ પોઈન્ટ કે ૫.૮૩ ટકા વધીને ૮૭૪૫.૪૫ પોઈન્ટ બંધ રહ્યો હતો. શુક્રવારે રોકાણકારોની સંપત્તિમાં એક જ દિવસમાં રૂ. ૬.૩૨ લાખ કરોડનો વધારો થયો હતો. જો કે ગુરુવારે વિદેશી રોકાણકારો નેટ સેલર્સ રહ્યા હતા અને બજારમાંથી રૂ. ૪૬૨૨.૯૩ કરોડનું રોકાણ પાછું ખેંચ્યું હતું. વિશ્વ બજારમાં ક્રૂડ તેલ વાયદો ૨.૪૬ ટકા વધીને બેરલદીઠ ૨૯.૧૭ ડોલર રહ્યો હતો. મોદી સરકાર દ્વારા કોરોના સ્પેશ્યલ ફંડ રચવામાં આવતા બજારનું સેન્ટિમેન્ટ સુધર્યું હતું અને રોકાણકારોમાં ઉત્સાહનો સંચાર થયો હતો. જો કે નિષ્ણાતોનાં મતે બજારમાં હજી અફરાતફરી ચાલુ રહેવાની શક્યતા છે.
બજારમાં તેજીનાં કારણો
છેલ્લા ચાર દિવસનાં ઘટાડા પછી રોકાણકારોની શેરોમાં ઘટયા મથાળે વધેલી ખરીદી
અમેરિકા સહિત અનેક દેશો દ્વારા રાહત પેકેજની જાહેરાત
અમેરિકા સહિત એશિયાનાં બજારોમાં તેજી.
ક્રૂડ ઓઈલનાં ભાવમાં બે દિવસથી તેજીને કારણે સેન્ટિમેન્ટ સુધર્યું.
વિદેશનાં બજારોમાં સુધારો
યુરોપનાં બજારોમાં બ્રિટનનો FTSE ૧.૨૩ ટકા, ફ્રાન્સનો CAC ૫.૩૬ ટકા અને જર્મનીનો DAX ૪.૩૧ ટકા વધ્યો હતો. જ્યારે એશિયાનાં બજારોમાં જાપાનનો નિક્કી ૧.૦૪ ટકા ઘટયો હતો પણ શાંઘહાઈનો ઈન્ડેક્સ ૧.૬૧ ટકા, હોંગકોંગનો હેંગસેંગ ૪.૯૪ ટકા વધ્યો હતો.
અમેરિકાનો ડાઉ જોન્સ ૨૮૩ પોઈન્ટ અપ
આ લખાઈ રહ્યું છે ત્યારે અમેરિકાનો ડાઉ જોન્સ ૨૮૩ પોઈન્ટ ઊંચામાં ટ્રેડ થતો હતો. નાસ્ડેક ૧૮૯ અને એસ એન્ડ પી ૫૦૦ ઈન્ડેક્સ ૩૭ પોઈન્ટ અપ ટ્રેડ થતો હતો.
