લખીમપુર : યુપીના લખીમપુર કાંડમાં પોલીસે તપાસનો ધમધમાટ શરૂ કર્યો છે.બે લોકોની અટક કરીને તેમની તપાસ શરૂ કરાઇ છે અને કેન્દ્રીય મંત્રી અજય મિશ્રાના પુત્ર આશિષ મિશ્રાને પૂછપરછ માટે પોલીસે સમન્સ પાઠવ્યા
છે.આમ ટૂંકમાં જ મંત્રીના પુત્રની ધરપકડના ભણકારા વાગી રહ્યા છે.પોલીસે મિશ્રાની ઘરની બહાર નોટિસ ચોટાડી દીધી છે.આ અંગેની માહિતી આપતાં આઇજીપી લક્ષ્મી સિંહે જણાવ્યું હતું કે ‘જો આશિષ મિશ્રા સમન્સનું પાલન નહીં કરે તો કાનૂની પ્રક્રિયા અપનાવવામાં આવશે. જોકે આશિષને મોકલવામાં આવેલા સમન્સમાં કોઇ મર્યાદા અપાઇ નથી.’
કેન્દ્રીય મંત્રીના પુત્રનું નામ આઠ લોકોને ભોગ લેતી ત્રીજી ઓક્ટોબરની આ ઘટનામાં કરાયેલી એફઆઇઆરમાં સામેલ છે.જેમાં હત્યાના ગુનાની કલમ પણ સામેલ છે.આ કેસમાં તમામની ધરપકડ કરાઇ છે કે તેમને કસ્ટડી સોંપાઇ છે કે કેમ તેવા સવાલના જવાબમાં સિંહે ઉમેર્યું હતું કે જ્યાં બે આરોપીઓની પૂછપરછ કરાઇ રહી છે તે પોલીસ લાઇન્સમાં એડીજીપી એસ એન સબોત પહોંચી ગયા છે.આઇજીએ કહ્યું હતું કે આ ત્રણ લોકો કથિતરીતે આ કાંડમાં સામેલ છે કે કેમ તેમની ભૂમિકા અગાઉ સ્પષ્ટ નહતી. પરંતુ હવે ચીજો સ્પષ્ટ થઇ છે. જોકે તેમણે હાલના તબક્કે વધુ વિગતો આપવાનો ઇનકાર કર્યો છે.
લખીમપુરની ઘટના ‘કમનસીબ’: સુપ્રીમ
નવી દિલ્હી: લખીમપુરની ઘટનાને ‘કમનસીબ’ ગણાવતાં સુપ્રીમ કોર્ટે ગુરુવારે એફઆઇઆરમાં પોલીસ દ્વારા સામેલ આરોપીઓ અંગે સ્ટેટસ રિપોર્ટની માગણી કરી હતી અને સવાલ કર્યો હતો કે આ લોકોની ધરપકડ કરાઇ છે કે કેમ તે પણ જણાવો. સુપ્રીમ કોર્ટે રાજ્યસરકાર દ્વારા સ્થાપવામાં આવેલી જ્યુડીશીયલ ઇન્ક્વાયરી કમીશન તેમજ સ્પેશિયલ ઇન્વેસ્ટિગેશન ટીમ (એસઆઇટી)ની વિગતો પણ માગી હતી. આરોપીઓને બચાવવામાં ભાજપ સરકાર લાગી છે તેવા વિરોધ પક્ષોના આરોપો સાથે આ ઘટનાએ સમગ્ર દેશમાં ચકચાર મચાવી છે.ચીફ જસ્ટિસ એન વી રામનાએ સુઓ મોટો નોંધ લઇને આ કેસની સુનાવણી કરી હતી. બેન્ચે કહ્યું હતું કે ‘તમે તમારી જાતે જ કહ્યું છે અને તેનું રિપોર્ટિંગ પણ થયું છે અને અમને જે પિટીશન મળી છે તેમાં આઠ વ્યક્તિઓ કે જેમાં અનેક ખેડૂતો પણ સામેલ છે તેમના મોત અંગેની છે. આ તમામ કમનસીબ ઘટના છે કે જેમાં વિવિધ લોકોની હત્યા કરાઇ છે.’
હાઇકોર્ટના નિવૃત્ત જજને તપાસ સોંપાઈ
લખનૌ: યુપી સરકારે લખીમપુર ઘટનામાં તપાસ માટે એક સભ્યની જ્યુડીશીયલ કમીશનની રચના કરી છે.અલ્હાબાદના હાઇકોર્ટના નિવૃત્ત જજ પ્રદીપ કુમાર શ્રીવાસ્તવને તપાસ સોંપવામાં આવી છે.કોંગ્રેસ નેતા પ્રિયંકા ગાંધી વાડરાએ કહ્યું હતું કે સુપ્રીમ કોર્ટ કે હાઇકોર્ટના વર્તમાન સભ્ય દ્વારા નહિ કે નિવૃત્ત જજ થકી તપાસ થવી જોઇએ.
