નવી મુંબઈ પછી ડોમ્બિવલીમાં એક ચોંકાવનારી ઘટના બની છે.ડોમ્બિવલી સ્ટેશન નજીક એસ.કે.પાટીલ ચોકમાં ટ્રાફિક કૉન્સ્ટેબલ બાળાસાહેબ હોરે ફરજ બજાવી રહ્યો હતો ત્યારે કાળા કાચ લગાડેલી અને જોરજોરથી ટેપ વગાડતી એક કાર ત્યાંથી પસાર થઈ રહી હતી.એ કારને રોકવાનો પ્રયાસ કૉન્સ્ટેબલે કર્યો હતો,પણ ડ્રાઇવરે પોલીસને જોઈને કાર દોડાવી મૂકી હતી.એ દરમ્યાન કારને પકડવા જતાં કૉન્સ્ટેબલ કારના બોનેટ પર લટકી ગયો હતો અને આશરે ૨૦૦ મીટર સુધી કાર સાથે ઢસડાયો હોવાથી તેના પગ અને હાથમાં ઈજા થઈ હતી.આ તમામ ઘટના સીસીટીવી કૅમેરામાં કેદ થઈ ગઈ હતી.ડોમ્બિવલી પોલીસે ફરિયાદ નોંધી ૧૭ વર્ષના ટીનેજરની ધરપકડ કરી હતી.
ટ્રાફિક કૉન્સ્ટેબલ બાળાસાહેબ હોરે બુધવારે સાંજે ૬ વાગ્યે ડોમ્બિવલી સ્ટેશન નજીક એસ.કે.પાટીલ ચોક પર પોતાની ફરજ બજાવી રહ્યો હતો એ દરમ્યાન એક શંકાસ્પદ કાર ત્યાંથી પસાર થઈ રહી હતી. કૉન્સ્ટેબલ હોરેએ ડ્રાઇવરને કાર રોકવાની ચેતવણી આપી,પરંતુ ડ્રાઇવર રોકાયો નહોતો અને હોરેને ટક્કર મારી નાસી જવાનો પ્રયાસ કર્યો હતો.એ વખતે હોરે દોડીને કારનું બોનેટ પકડીને લટકી ગયો હતો. ઘટનાસ્થળેથી નાસી જવા માટે ડ્રાઇવરે વાહનને ઊંધી દિશામાં વાળ્યું હતું અને ચિપલૂણકર રોડ થઈ બાલ ભવન તરફ લઈ ગયો.એ પછી ડ્રાઇવર હોરેને બોનેટ પરથી નીચે પટકીને ત્યાંથી નાસી ગયો હતો.આ ઘટના સીસીટીવી કૅમેરામાં કેદ થઈ હતી.
ડ્રાઇવરે રિક્ષાચાલકને પણ ટક્કર મારી હતી,જેમાં રિક્ષાચાલકને ઈજા થઈ હતી. હોરેને હાથ-પગમાં ઈજા થઈ છે અને તેની સારવાર ચાલી રહી છે.ડોમ્બિવલીના સિનિયર પોલીસ ઇન્સ્પેક્ટર સચિન સાંડભરે ‘મિડ-ડે’ને કહ્યું હતું કે‘અમે ઘટના સમયનાં સીસીટીવી કૅમેરાનાં ફુટેજ ભેગાં કરીને કારમાલિક સુધી ગણતરીના કલાકોમાં પહોંચી ગયા હતા.એ દરમ્યાન કાર ચલાવનાર ૧૭ વર્ષના કિશોરની ધરપકડ કરી હતી. તેણે અમારી સામે કબૂલ્યું હતું કે એ સમયે તેની પાસે લાઇસન્સ નહોતું એથી તેણે નાસી જવાનો પ્રયાસ કર્યો હતો.આરોપી પર અમે ૩૦૭,૩૩૨,૩૫૩નો ગુનો નોંધી તપાસ હાથ ધરી છે.
