– બંને સાગરીતો કાનો રબારી અને કિશન કુંભારવાડીયા પણ પોલીસમાં હાજર
– જેના વિરુદ્ધ પોલીસે કાયદેસરની કાર્યવાહી હાથ ધરી છે
રાજકોટમાં ગત તા.7 ડિસેમ્બરે સર્વેશ્ર્વર ચોકમાં ક્ષત્રિય યુવાન મયુરસિંહ રાણાને આંતરીને તેના ઉપર પાઈપ વડે હુમલો કરનાર દેવાયત ગઈકાલે 10 દિવસ બાદ પોલીસ સમક્ષ હાજર થયો હતો.ત્યારબાદ દેવાયતને રાતભર સામાન્ય ગુનેગારની જેમ લોકઅપમાં રાખ્યા બાદ પોલીસે આજે રિમાન્ડની માંગ સાથે કોર્ટમાં રજૂ કરાયો હતો.બીજીતરફ આ ગુનામાં દેવાયતનો સાથ આપનાર તેના બંને સાગરીતો કાનો રબારી અને કિશન કુંભારવાડીયા પણ પોલીસમાં હાજર થયા છે.જેના વિરુદ્ધ પોલીસે કાયદેસરની કાર્યવાહી હાથ ધરી છે.
જાણવા મળતી વિગતો અનુસાર, દેવાયત હુમલો કરી ફરાર થઈ ગયા બાદ 10 દિવસ સુધી ક્યાં ક્યાં રોકાયો હતો ? તેમજ આ હુમલો શા માટે કરવામાં આવ્યો છે? સહિતનાં મુદ્દે રિમાન્ડ દરમિયાન પોલીસ દ્વારા પૂછતાછ કરવામાં આવશે.ઉપરાંત હુમલામાં વપરાયેલો પાઈપ દેવાયત ક્યાંથી લાવ્યો હતો તેની પણ તપાસ થશે.આ સાથે જ તેને આશરો આપનારા લોકો સામે પણ ગુનો નોંધવાનો પોલીસ દ્વારા દાવો કરવામાં આવ્યો છે.જોકે વાત એવી પણ સામે આવી રહી છે કે આ દસ દિવસ દરમિયાન દેવાયતે પોતાના રાજકીય મીત્રોનું જ શરણું લીધું હતું.ત્યારે તેની સામે ગુનો નોંધવાનું પોલીસ માટે કપરું બની રહેશે.
બીજી તરફ દેવાયત ખવડનાં વકીલે જણાવ્યું હતું કે, આ હુમલામાં દેવાયત ખવડ હતો જ નહીં.એડવોકેટ ઉત્કર્ષ દવેના જણાવ્યા મુજબ, ક્યાંક ને ક્યાંક આ આપસી દુશ્મનીનો મામલો હોય એવું લાગી રહ્યું છે.પોલીસે 307 હેઠળ આ FIR કરી છે જે સંપૂર્ણપણે ખોટી છે.જો આ પ્રોસિક્યુશનનો કેસ માનવા જઇએ અને જે CCTV ફૂટેજના આધારે FIR કરવામાં આવી છે તે CCTVમાં ફૂટેજમાં સ્પષ્ટપણે દેખાય છે કે કોઇક વ્યક્તિ કે જેનું મોઢું નથી દેખાતું.તે કોઇક ડંડા અથવા તો લોખંડના પાઇપ વડે એના પર હુમલો કરી રહ્યો છે,તેના પગ પર મારી રહ્યો છે.માથાના ભાગે કોઇએ માર્યું નથી.સાતથી આઠ વખત તેને માર્યું છે અને કોઇ ગંભીર ઇજા કરી નથી તો 307નો ઉમેરો તેમાં ક્યારેય થાય નહીં.
આ સમગ્ર ઘટનાની વાત કરીએ તો 7 ડિસેમ્બરે બપોરે 2:30 વાગ્યાના અરસામાં દેવાયત ખવડ અને તેની સાથે બે શખ્સ નંબર પ્લેટ વગરની સ્વીફટ કારમાં ધસી આવ્યા હતા. અને ક્ષત્રિય યુવાન મયુરસિંહ રાણાને આંતરીને તેના ઉપર પાઈપ જેવા ઘાતક હથિયારો સાથે તૂટી પડી તેને મરણતોલ માર માર્યો હતો.દેવાયતના હુમલાને કારણે મયુરસિંહ રાણાના બન્ને પગ ભાંગી ગયા હતા તેમજ હાથ અને માથામાં પણ ઈજાઓ પહોંચતાં હજુ સુધી તે હોસ્પિટલમાં સઘન સારવાર હેઠળ છે.પોલીસે દેવાયતને પકડવા માટે ઠેર-ઠેર દરોડા પાડ્યા હતા પરંતુ તે હાથમાં આવ્યો નહોતો.જોકે ગત બપોરે અચાનક તે સામેથી ક્રાઈમ બ્રાન્ચ સમક્ષ હાજર થતા તેનો કબજો એ-ડિવિઝન પોલીસને સોંપી દેવાયો હતો.
