મુંબઈ,
કોરોના વાયરસને પગલે દેશવ્યાપી લોકડાઉનને કારણે એપ્રિલ મહિનામાં સર્વિસ સેક્ટરની પ્રવૃત્તિ ઠપ થઈ ગઈ હતી અને ઐતિહાસિક નીચી સપાટીએ આવી ગઈ હતી.આઈએચએસ મર્કિટ ઈન્ડિયા સર્વિસીઝ બિઝનેસ એક્ટિવિટી ઈન્ડેક્સ એપ્રિલમાં ગગડીને માત્ર 5.4 થઈ ગયો હતો,જે માર્ચમાં 49.3 હતો. આ ઈન્ડેક્સ ડિસેમ્બર 2005માં બનવાનું શરૂ થયું ત્યારથી અત્યાર સુધીનું આ સૌથી નીચું સ્તર એપ્રિલમાં નોંધાયું છે.
આઈએચએસ મર્કિટ ઈન્ડિયા સર્વિસીઝ પરચેઝીંગ મેનેજર્સ ઈન્ડેક્સ (PMI) એપ્રિલમાં માત્ર 5.4 નોંધાયો હતો.મતલબ કે તે 40 પોઈન્ટ ગગડીને ખાસ્સો નીચો આવી ગયો હતો. લોકડાઉનને કારણે મોટાભાગના સર્વિસીઝ બિઝનેસ બંધ રહ્યા હતા.માંગ પણ ઘટી ગઈ હતી.દરમિયાન કમ્પોઝિટ (સર્વિસીઝ અને મેન્યુફેક્ચરિંગનો સંયુક્ત) પીએમઆઈ આઉટપુટ ઈન્ડેક્સ એપ્રિલમાં 7.2 થઈ ગયો હતો, જે માર્ચમાં 50.6 હતો,જે ડિસેમ્બર-2005 પછીથી સૌથી નીચો છે.
આંતરરાષ્ટ્રીય સ્તર પર પણ કોરોનાનો કેર હોવાથી એપ્રિલમાં તમામ સ્તર પર કામગીરી ઠપ રહેવાથી આ ઈન્ડેક્સ ઝીરો થઈ ગયો હતો.જીડીપીના ડેટા સાથે ઐતિહાસિક સરખામણી કરતા માલૂમ થાય છે કે દેશનું અર્થતંત્ર એપ્રિલમાં 15 ટકાના વાર્ષિક દરે ઘટ્યું હતું.મતલબ કે તેમાં નેગિટવ ગ્રોથ જોવા મળ્યો હતો.આમ,કોરોના અને લોકડાઉનને કારણે અર્થતંત્ર પર વ્યાપક અસર થઈ છે તે સ્પષ્ટ છે. જોકે હવે જેમ-જેમ લોકડાઉન ખૂલશે તેમ-તેમ સ્થિતિમાં સુધારો આવશે તેવી આશા છે.
રોજગાર અંગે સર્વેમાં કહેવાયું હતું કે બિઝનેસમાં જરૂરિયાત જ ઘટી ગઈ હોવાથી કેટલીક સર્વિસીઝ કંપનીઓએ એપ્રિલમાં સ્ટાફમાં ઘટાડો કરી નાખ્યો હતો.ભાવના મોરચે સર્વેમાં કહેવાયું હતું કે રો મટીરિયલ અને ઉત્પાદન ખર્ચ માર્ચની સરખામણીમાં ઘટ્યા હતા.મેન્યુફેક્ચરર્સમાં આ ખર્ચ સર્વિસ પ્રોવાઈડર્સની સરખામણીમાં વધારે ઘટ્યો હતો.સર્વે અનુસાર આગામી સમયમાં બિઝનેસ કોન્ફિડન્સ વધારે ઘટવાની સંભાવના છે.ભવિષ્યમાં સ્થિતિ કેવી રહેશે તે અંગે સતત બીજા મહિને કોન્ફિડન્સ નબળો રહ્યો હતો.આ પ્રમાણ ડિસેમ્બર 2015 પછીથી સૌથી નબળું રહ્યું હતું.
