સાપુતારા : વલસાડનાં સાપ્તાહિક અખબારનાં તંત્રી સહિત પરિવારજનો સામે પોલીસ દ્વારા ખોટી રીતે ફરીયાદ દાખલ કરવાનાં મુદ્દે ડાંગ જિલ્લા સિનિયર પત્રકાર સંઘ સહિત ડાંગ સક્રિય પત્રકાર સંઘનાં હોદેદારોએ મુખ્યમંત્રીને સંબોધીને ડાંગ કલેક્ટરને આવેદનપત્ર સુપ્રત કર્યુ હતુ…
ડાંગ જિલ્લા સિનિયર પત્રકાર સંઘ તથા ડાંગ જિલ્લા સક્રિય પત્રકાર સંઘમાં જોડાયેલ અને રાજ્યનાં પ્રતિષ્ઠીત અખબાર તથા જુદી જુદી ચેનલોનાં તથા લોકલ ચેનલોમાં કામ કરતા પત્રકારમિત્રો તથા ખબરપત્રીઓ દ્વારા આજરોજ મુખ્યમંત્રીને સંબોધીને ડાંગ કલેક્ટરને આવેદનપત્ર પાઠવી જણાવ્યુ હતુ કે ગત તા.07-04-2022નાં રોજ વલસાડથી પ્રસિધ્ધ થતા સાપ્તાહિક અખબાર દક્ષિણ ગુજરાત વર્તમાનમાં દારૂની હેરાફેરી સબંધે ” વહીવટદારોએ બુટલેગરો સાથે સેટીંગ કરી લીધુનાં શીર્ષક હેઠળ સમાચાર છપાયા હતા.જે સમાચાર બાદ સાપ્તાહિક અખબારનાં તંત્રી પુણ્યપાલ શાહ સામે વલસાડ પોલીસ ગંભીર કલમ લગાવી ગુનો દાખલ કરી એમના સુરત સ્થિત ઘરેથી ધરપકડ કરી હતી.એનાથી વધુ અપમાનજનક બાબત એ છે કે પોલીસ જેને આ અખબાર સાથે કોઈ લેવા દેવા નથી અને તેઓ પરિવાર સાથે બીલીમોરામાં પરિવારથી અલગ રહે છે.એવા તેમના કાકા જયંતિભાઈ સામે પણ ફરિયાદ નોંધી છે.આ ઉપરાંત પુણ્યપાલ શાહનાં અન્ય કાકા અનિલભાઈ શાહ સામે પણ ગુનો દાખલ કર્યો છે.પત્રકાર પોતાની ફરજનાં ભાગરૂપે કામ કરતા હોય છે.પત્રકાર કોઈના માટે અપમાનજનક લખાણો લખે તો તેમના માટે કોર્ટના દ્વાર ખુલ્લા છે.અને આર્ટિકલનાં આધારે વાચકો સાથે છેતરપિંડી અને વિશ્વાસઘાત કરાયો હોવાની પોલીસ જાતે ફરિયાદી બની પત્રકારનાં પરિવાર સામે પણ ફરિયાદ નોંધાવે એ કેટલે અંશે વ્યાજબી કહેવાય.તથા અમારા તમામ પત્રકારોનું કહેવું છે કે જો પત્રકારોએ પોલીસતંત્રનાં દરેક સમાચાર પોલીસ અધિકારીઓ કહે તે રીતે જ છાપવાના હોય તો પત્રકારત્વનું મુલ્ય કઈ રીતે જાળવી શકાશે.વધુમાં અમે એટલુ સમજીએ છીએ કે આપની સરકારનાં રાજમાં પત્રકારો નિયમિતપણે પોતાની ફરજ બજાવી શકે છે.પરંતુ આ ઘટના પરથી લાગે છે કે આપની સરકારમાં પણ પોલીસ અધિકારીઓ પોતાની સત્તાનો દુરુપયોગ કરી અધિકારી રાજ ચલાવી રહયા છે.જેથી ડાંગ જિલ્લાનાં તમામ પત્રકારો અને ખબરપત્રીઓ આ ઘટનાને સખત શબ્દોમાં વખોડી કાઢે છે.તેમજ ખોટી રીતે મીડીયાને દબાવવા માટે દાખલ કરાયેલી એફ.આઈ.આરને સી સમરી કરવામાં આવે અને ફરી વખત કોઈપણ મીડીયાકર્મી સામે અહેવાલ સંદર્ભે સત્તાનો દુરુપયોગ કરી ફરિયાદ દાખલ ન થાય તેવી અમારી માંગણી છે.આ ઉપરાંત સમગ્ર ઘટનાની તપાસ રાજયનાં ડીજી કક્ષાએથી કરવામાં આવે એવી અમારી માંગણી છે.આ આવેદનપત્ર આપતી વેળાએ ડાંગ જિલ્લા સિનિયર પત્રકાર સંઘનાં પ્રમુખ ગીરીશકુમાર ભોયે,ડાંગ જિલ્લા સક્રિય પત્રકાર સંઘનાં પ્રમુખ પાંડુભાઈ ચૌધરી, મહામંત્રી શેખરભાઈ ખેરનાર,ચિરાગભાઈ પંચાલ સહિત ખબરપત્રીઓમાં હિતાર્થે પટેલ સોમનાથ પવાર,જઈદ પવાર,રોનક જાની,કેતન પટેલ,નિલેશભાઈ સુરતી,શૈલેષભાઈ સોલંકી,સોમનાથ ગાયકવાડ,મુનિરા શેખ,યોગીતા પટેલ,લક્ષમણ બાગુલ,વનરાજ પવાર,હેમંતભાઈ હડશ,શુશીલભાઈ પવાર,કાળુભાઈ ગાડવે,પુંડલીક વાઘમારે ઉપસ્થિત રહ્યા હતા.
