અમદાવાદ : ગોમતીપુરમાં રહેતી પત્ની પર શંકા રાખીને ડોક્ટર પતિ અવાર નવાર મારઝુડ કરતો હતો,પત્ની તેના પિતાનો જન્મ દિવસ હોવાથી પિયરમાં ગઈ અને ઘરે આવતા મોડું થયું ત્યારે ઉશ્કેરાયેલા ડોક્ટર પતિએ પત્ની સાથે મારઝુડ કરી 3 વાર તલ્લાક બોલી છૂટેછાડા આપી દીધા હતા.જેથી તંગ આવેલી પત્નીએ ગોમતીપુર પોલીસ સ્ટેશનમાં પતિની વિરુદ્ધમાં ફરિયાદ નોંધાવતા પોલીસે ગુનો નોંધી વધુ તપાસ હાથ ધરી છે.
ગોમતીપુરમાં રહેતી યુવતીના વર્ષ 2020માં ધંધુકામાં રહેતા ડોક્ટર યુવક સાથે લગ્ન થયા હતા.પતિ અર્બન હેલ્થ સેન્ટરમાં નોકરી કરતો હોવાથી તેઓ ભાડાના મકાનમાં રહેવા માટે અમદાવાદ આવી ગયા હતા.બીજી બાજુ પતિ શંકાશીલ હોવાથી જો યુવતી કોઈની સાથે વાતો કરે તો વાતો કરવાની ના પાડતો હતો.આ ઉપરાંત પત્ની જ્યાં પણ જાય ત્યાં તેની સાથે જ જતો.એટલું જ નહીં પતિ નોકરીએથી ઘરે આવીને પત્નીનો મોબાઇલ ફોન પણ ચેક કરતો હતો.યુવતી જો સગા-સંબંધીના ઘરે જાય તો પતિ ઝઘડો કરી મારઝુડ કરતો હતો.અવાર નવાર ખોટી શંકા રાખીને શારિરીક માનસિક ત્રાસ આપતો હતો.એક દિવસ યુવતીના પિતાનો જન્મ દિવસ હોવાથી યુવતી તેના પિતાના ઘરે ગઈ હતી અને પરત સાસરીમાં આવતા મોડું થયું હતું.જેથી ડોક્ટર પતિએ આ વાતને લઈને તેની સાથે ઝઘડો કરી માર માર્યો અને 3 વાર તલ્લાક બોલી છૂટાછેડા આપી દીધા હતાં અને ઘરમાંથી નીકળી જવા માટે જણાવ્યું હતું.જેથી યુવતી તેના પિયરમાં પહોંચી હતી.બાદમાં તેણે તેના પરિવારજનોને જાણ કરી ગોમતીપુર પોલીસ સ્ટેશનમાં આ અંગે ફરિયાદ નોંધાવતા પોલીસે પતિની વિરુદ્ધમાં ગુનો નોંધી વધુ તપાસ આરંભી છે.
