– કોંગ્રેસ પ્રેરિત સહકાર પેનલનો 3 બેઠકો ઉપર જ્યારે BJP એ 13 બેઠકો પર વિજય
ભરૂચ, તા. 18 એપ્રિલ 2023, મંગળવાર : વાલિયા APMC ની ચુંટણીની મતગણતરીમાં ભાજપની ખેડૂત સમર્પણ પેનલનો ભવ્ય વિજય થયો હતો જયારે સહકાર પેનલના ત્રણ ઉમેદવારો ચૂંટાઈ આવ્યા હતા.ગતરોજ સવારે 9 કલાકે વાલિયા એપીએમસી ખાતે જીલ્લા રજીસ્ટ્રાર અને વાલિયા બજાર સમિતિ ચુંટણી અધિકારી પરેશ કંકોટીયાની હાજરીમાં વાલિયા એ.પી.એમ.સી.ની ચુંટણી માટે મતદાન પ્રક્રિયા હાથ ધરાઈ હતી.
સવારથી મતદારોનો ઉત્સાહ જોવા મળ્યો હતો.આ ચુંટણીમાં કેટલાક મતદારોનું ઈરાદા પૂર્વક મતદાન યાદીમાંથી નામ કમી કરવા મુદ્દે વાતાવરણ ગરમાયું હતું.જો કે સાંજે પાંચ વાગ્યા સુધીમાં શાંતિ પૂર્વક વાતાવરણમાં મતદાન પ્રક્રિયા પૂર્ણ થઇ હતી. મતદાન પેટીઓને સીલબંધ કરી ચુસ્ત પોલીસ બંદોબસ્ત ગોઠવી એપીએમસી ખાતે મુકવામાં આવી હતી.આજરોજ મંગળવારે ચુંટણી અધિકારીની હાજરીમાં મતદાન પેટીઓ ખુલ્લી મતગણતરી હાથ ધરવામાં આવી હતી.મત પેટીઓ ખુલતા ધીરે ધીરે ઉમેદવારોનું ભાવી ખુલતું જોવા મળ્યું હતું.ખેતીવાડી ઉત્પન્ન બજાર સમિતિની 16 બેઠકોમાં ખેડૂત વિભાગની 10 બેઠકો ઉપર 20 પૈકી ભાજપ પ્રેરિત ખેડૂત સમર્પણ પેનલના 9 ઉમેદવારોનો ભવ્ય વિજય થયો હતો.જયારે એક બેઠક ઉપર બંને ઉમેદવારોને સરખા મત મળતા ચિઠ્ઠી ઉછાળી ભાજપના અશોક વેચાણભાઈ ગામીતને વિજેતા જાહેર કરાયા હતા.
તો સહકારી ખરીદ વેચાણ વિભાગની 2 બેઠકો માટે 4 ઉમેદવારો પૈકી સહકાર પટેલના બે ઉમેદવારોનો વિજય થયો હતો.જયારે વેપારી વિભાગની ચાર બેઠકો ઉપર સાત ઉમેદવારોએ ઉમેદવારી નોંધાવી હતી જેમાં ત્રણ બેઠક ઉપર ખેડૂત સમર્પણ પેનલ અને એક બેઠક ઉપર સહકાર પેનલના ઉમેદવાર ચૂંટાઈ આવ્યા હતા.
