મુંબઇ : ભિવંડીમાં આવેલ એક ખાનગી સ્કૂલના બે હેડમાસ્તર અને એક શિક્ષકની ૩૫૦૦ રૃપિયાની કથિત લાંચ સ્વીકારતા એસીબીએ રંગેહાથો ધરપકડ કરી હતી.આ ખાનગી સ્કૂલને સરકારી ગ્રાન્ટ મળતી હોવા છતાં તેમણે એડમિશનની માગણી કરી હતી.આ સંદર્ભે એસીબીએ બહાર પાડેલ એક પત્રક મુજબ ગુરુવારે સાંજે ત્રણેયની ધરપકડ કરવામાં આવી હતી. પકડાયેલાઓમાં સ્કૂલના પ્રાથમિક વિભાગના હેડમાસ્તર દીપક લેલે (૫૫), સેકન્ડરી વિભાગના હેડમાસ્તર આત્મારામ વાઘ (૫૭) અને શિક્ષક સુરેશ કુલકર્ણી (૫૨)નો સમાવેશ થાય છે.
આ સંદર્ભે અધિકારીઓ અનુસાર ફરિયાદીએ જ્યારે તેના ભત્રીજાનું આઠમાં ધોરણમાં એડમિશન મેળવવા સ્કૂલનો સંપર્ક કર્યો ત્યારે તેમના પાસેથી ૩૫૦૦ રૃપિયાની લાંચ ડોનેશન સ્વરૃપે માગવામાં આવી હતી.આ રકમની પાવતી ત્રણ-ચાર મહિના બાદ આપવામાં આવશે તેવું ફરિયાદીને જણાવવામાં આવ્યું હતું.આ ઘટના બાદ ફરિયાદીએ થાણે એન્ટીકરપ્શન બ્યુરોનો સંપર્ક કરી ફરિયાદ નોંધાવતા અધિકારીઓએ આ વાતની ખરાઇ કરી છટકું ગોઠવ્યું હતું જેમાં આ ત્રણેય જણા આબાદ સપડાઇ ગયા હતા.આ સંદર્ભે ભિવંડીના સ્થાનિક પોલીસ સ્ટેશનમાં ભ્રષ્ટાચાર કાયદા હેઠળ ગુનો નોંધી વધુ તપાસ આદરી છે.
