- આમ આદમી પાર્ટી દ્વારા પેપર લીક મુદ્દે રાજયભરની અંદર ઉગ્ર વિરોધ નોંધાવવામાં આવ્યો છે.આજે સવારે પણ જિલ્લા સેવા સદન ખાતે આમ આદમી પાર્ટીના વિરોધ પક્ષના નેતા તેમજ સંગઠનના નેતાઓ દ્વારા ઉગ્ર વિરોધ નોંધાવવામાં આવ્યો હતો.જેને ધ્યાનમાં રાખીને પોલીસ દ્વારા ભારતીય જનતા પાર્ટી કમલમ ઉધના ખાતે પોલીસ બંદોબસ્ત રાખ્યો હતો.સાથે સાથે પ્રદેશ અધ્યક્ષ સી.આર.પાટીલની ઓફિસની બહાર પણ પોલીસ બંદોબસ્ત ગોઠવી દેવામાં આવ્યો હતો. આમ આદમી પાર્ટીના કાર્યકર્તાઓએ ત્યાં વિરોધ કરવા ન પહોંચી જાય તેની સાવચેતીના ભાગરૂપે બંદોબસ્ત ગોઠવાયો હતો.
શંકાના આધારે બંદોબસ્ત : સી. આર. પાટીલની ઓફિસની બહાર આ પ્રકારે લગભગ બંદોબસ્ત જોવા મળતો નથી.તે પણ કોઈ વિરોધ પાર્ટી દ્વારા વિરોધ પ્રદર્શન કોઈ મુદ્દે કરવામાં આવતું હોય અને કાર્યાલય ઉપર વિરોધ કરવા આવે તેવું અત્યાર સુધી ખૂબ ઓછું બન્યું છે.કદાચ રજૂઆત કરવા માટે ક્યારેક કોઈ પહોંચ્યા હોઈ શકે.પરંતુ આમ આદમી પાર્ટીનો હાઉ ઉભો થયો છે.જે ઉધના ભાજપ કાર્યાલયથી લઈને સી.આર.પાટીલની ઓફિસ સુધી પહોંચી ગયેલો સ્પષ્ટ જોવા મળી રહ્યો છે.અમદાવાદ ખાતે ભારતીય જનતા પાર્ટીની ઓફિસમાં થયેલા વિરોધ બાદ સી.આર.પાટીલની ઓફિસે પણ આમ આદમી પાર્ટીના કાર્યકર્તાઓ પહોંચી શકે છે.તેવી શંકાના આધારે પોલીસ બંદોબસ્ત ગોઠવાયો હતો.
વિરોધ નોધાવવામાં આપ સફળ : આમ આદમી પાર્ટીએ હેડ ક્લાર્કની પરીક્ષાના પેપર ફૂટવાને લઈને ખૂબ જ ઉગ્ર રીતે રાજ્ય સરકાર અને ભારતીય જનતા પાર્ટી સામે વિરોધ નોંધાવવામાં સફળ થઈ રહ્યો હોય તેવું લાગી રહ્યું છે.અમદાવાદથી લઈને રાજ્યના તમામ શહેરોમાં આમ આદમી પાર્ટીની સક્રિયતા જોવા મળી રહી છે.સી.આર.પાટીલની ઓફિસ સુધી જો બંદોબસ્ત ગોઠવવાનો વખત આવતો હોય તો સ્વાભાવિક રીતે આમ આદમી પાર્ટી પોતાની સંગઠનની તાકાત બતાવવામાં સફળ થતી દેખાઈ રહી છે. એવું હાલની રાજકીય સ્થિતિ જોતા માની શકાય. આપ દ્વારા જિલ્લા સેવા સદન ખાતે અને ત્યારબાદ ગાંધી પ્રતિમા ખાતે જે રીતે વિરોધ પ્રદર્શન થયું તે જોતા સુરત શહેરમાં સંગઠનાત્મક રીતે આમ આદમી પાર્ટી ધીરે ધીરે પોતાની તાકાત બતાવી રહ્યો હોય તેવું જણાય છે.
