– નવાં વર્ષની રજાઓમાં જ 18 કરોડ મળ્યા
– એક વર્ષમાં 12 કરોડથી વધુનું 26 કિલો સોનું, 330 કિલોગ્રામ ચાંદી પણ મળી
મુંબઇ : મહારાષ્ટ્રના શિર્ડી સાઇ મંદિરે દર વર્ષે લાખોની સંખ્યામાં ભાવિકો દર્શનાર્થે આવતાં હોય છે.અહીં આવનારા શ્રદ્ધાળુઓ ખુલ્લા મને દાનનો ધોધ પણ વહાવે છે.સાઇ ટ્રસ્ટ દ્વારા વર્ષ ૨૦૨૨માં મળેલ દાનની માહિતી જાહેર કરાઇ છે.મંદિર ટ્રસ્ટ મુજબ ૨૦૨૨માં સાઇ મંદિરને ૪૦૦ કરોડથી વધુનું દાન મળ્યું છે.ન્યૂયરના દિવસોમાં આઠ લાખથી વધુ ભાવિકોએ શિર્ડીના દર્શન કર્યા છે.
શ્રી સાઇ મંદિર ટ્રસ્ટના સીઇઓના જણાવ્યાનુસાર કુલ ૪૦૦,૧૭,૬૪,૨૦૧રૃપિયા ૨૦૨૨માં દાનપેટે મળ્યા છે.પચ્ચીસમી ડસેમ્બર બાદ ન્યૂયરના દિવસોમાં જ ૧૭.૮૧ કરોડનું દાન પ્રાપ્ત થયું છે.૧૬૭.૭૭ કરોડ રૃપિયા દાન પેટીમાં તો ૭૪ કરોડથી વધુની રકમ કાઉન્ટર રસીદ દ્વારા મળી છે. ટ્રસ્ટને ઓનલાઇન પેમેન્ટ,ચેક,મની ઓર્ડરથી ૧૪૪ કરોડથી વધુ રકમ મળી છે.જો કે તેમાં સોના- ચાંદીના દાગીનાની રકમ પણ સમાવિષ્ટ છે. ૨૦૨૨માં સાઇબાબાને ૨૬ કિલોથી વધુ સોનું મળ્યું જેની કિંમત ૧૨ કરોડ રૃપિયાથી વધુની છે.તો આશરે ૧.૫ કરોડ રૃપિયાથી વધુની કિંમતનું ૩૩૦ કિલોગ્રામ ચાંદી વિવિધ માધ્યમે પ્રાપ્ત થયું છે.
ટ્રસ્ટને દાનમાં મળતી રકમમાંથી મંદિરના હજારો કર્મચારીઓના પગાર ચૂકવાય છે તો ટ્રસ્ટ વતી બે હોસ્પિટલ અને શિક્ષણ સંસ્થા પણ ચલાવાય છે.જ્યાં નિઃશુલ્ક સારવાર,દવા અને શિક્ષણ અપાય છે.વળી દરરોજ ૫૦ હજારથી એક લાખ ભક્તો માટે ભોજનાલય પણ ચલાવાય છે.આ તમામ કાર્યમાં દાનમાં પ્રાપ્ત થતી રકમ ખર્ચાય છે.દાનની રકમની ગણતરી માટે બહુ મોટી સંખ્યામાં સ્ટાફને કામે લગાડાયો હતો.
