શું હવે ટ્વિટરનો ઉપયોગ કરવા માટે ચૂકવવી પડશે કિંમત?

દિલ્હી : વિશ્વના સૌથી અમીર વ્યક્તિ એલન મસ્ક સોશિયલ મીડિયા પ્લેટફોર્મ ટ્વિટરને ખરીદ્યા બાદથી સતત ચર્ચામાં છે.ફરી એકવાર તેમણે કંઈક એવું કહ્યું છે જેનાથી ટ્વિટર યુઝર્સ ચિંતામાં છે.હવે એલન મસ્કે એવા સંકેતો આપ્યા છે કે આવનારા સમયમાં ટ્વિટરનો મફતમાં ઉપયોગ નહીં થાય, જેના કારણે લોકોમાં પણ ચર્ચા છે.જોકે, એલન મસ્કે સ્પષ્ટ કર્યું કે તે કેઝ્યુઅલ યુઝર્સ માટે હંમેશા ફ્રી રહેશે.એલન મસ્કે ટ્વિટ કરીને કહ્યું કે, ટ્વિટર હંમેશા કેઝ્યુઅલ યુઝર્સ માટે ફ્રી રહેશે.પરંતુ કોમર્શિયલ અને સરકારી યુઝર્સ માટે નાની કિંમત ચૂકવવી પડી શકે છે.આ પહેલા એલન મસ્ક મંગળવારે ન્યૂયોર્કમાં મેટ ગાલામાં પણ હાજરી આપી હતી.આ દરમિયાન તેમણે કહ્યું કે ટ્વિટરની સફળતામાં એક મહત્વપૂર્ણ પગલું એ હશે કે તે તેના વપરાશકર્તાઓને મહત્વપૂર્ણ રીતે વિસ્તૃત કરી શકે છે.એટલું જ નહીં, તેમણે કહ્યું હતું કે હું ઈચ્છું છું કે અમેરિકાનો મોટો હિસ્સો ટ્વિટર પર હોય અને સંવાદમાં સામેલ થાય.25 એપ્રિલના રોજ એલન મસ્ક અને ટ્વિટર વચ્ચે સોદો થયો હતો અને ટેસ્લાના સીઇઓ એલન મસ્ક આ માઇક્રો-બ્લોગિંગ સાઇટને ખરીદવામાં સફળ થયા હતા.તેમણે 44 બિલિયન ડોલરમાં ટ્વિટર ખરીદ્યું.આ ડીલ પછી એવી ચર્ચા હતી કે ટ્વિટરમાં ઘણું બદલાઈ શકે છે.