-હાલ લોકડાઉનને કારણે ચૂંટણી લંબાય છે પરંતુ વહેલી ચૂંટણી કરે તો વર્તમાન શાસકોને ફાયદો થવાની સંભાવના જૂનમાં ચૂંટણી થાય તે માટે કેટલાક સંચાલકોના સરકારમાં હવાતિયાં
બારડોલી : ગુજરાત સહકારી ખાંડ મંડળીઓના સંચાલકો 31મી મેના રોજ ગત સિઝનમાં આવેલ શેરડીના ભાવ નક્કી કરવાના છે ત્યારે સૌ સભાસદો ભાવ અંગે ઉત્સુક છે. ચૂંટણી નજીકમાં હોય ખેડૂતોને પણ ખબર જ કે તેમને આ વખતે શેરડીના ભાવ દરવખત કરતાં વધુ સારા મળવાના છે.અને આ જ તકનો લાભ ઉઠાવી શુગર મિલના સંચાલકોએ લોકડાઉનને કારણે લંબાઈ ગયેલી ચૂંટણીઓ વહેલી થાય તે માટેના પ્રયાસો પણ શરૂ કરી દીધા હોવાનું જાણવા મળે છે.
સામાન્ય રીતે શેરડીના ભાવ 31મી માર્ચના રોજ શુગર ફેક્ટરીઓના બોર્ડ રૂમમાં નક્કી થતાં હોય છે.પરંતુ આ વખતે કોરોના મહામારીને કારણે લોકડાઉન હોય શેરડીના આખરના ભાવ માટે ખેડૂતોએ બે મહિના રાહ જોવી પડી છે.આગામી 31મી મે ના રોજ સંચાલકો આખરના ભાવ જાહેર કરશે તેની સાથે જ ચૂંટણીની ફોર્મ્યુલા પણ નક્કી કરી દેવામાં આવનાર હોવાનું જાણવા મળે છે.હાલ સહકારી મંડળીની ચૂંટણીઓ મુલતવી રાખવામાં આવી છે.પરંતુ ખાંડના ભાવ પડતાંની સાથે જ વહેલી તકે ચૂંટણી થાય તે માટે કેટલાક સંચાલકોએ પ્રયાસો શરૂ કર્યા છે.ખેડૂતોને સારા ભાવ આપી તરત ચૂંટણી યોજાય તો ખુરશી બચાવી શકાય એમ માની સંચાલકોએ ગાંધીનગરની દોટ શરૂ કરી છે અને ત્યાંથી તેમના માનિતાઓને ચૂંટણી માટે તૈયાર રહેવા જણાવી પણ દેવામાં આવ્યું છે.ત્યારે કેટલાક દાવેદારોએ તો ચૂંટણીની તૈયારીનો આરંભ પણ કરી દીધો હોવાનું જાણવા મળી રહ્યું છે.જો સરકાર સહકારી ખાંડ મંડળીઓની ચૂંટણી જૂનમાં જાહેર કરે તો ઘણા મતદારો મતદાનથી વંચિત રહી જાય એમ છે. કેમ કે ઘણા મતદારો વિદેશમાં હોય આ સમયગાળામાં આવી શકે એમ નથી.આ ઉપરાંત દેશના અન્ય શહેરોમાં રહેતા મતદારો પણ કોરોના કારણે આવી શકે એવી સ્થિતિમાં ન હોય તેઓ પણ મતદાન કરી શકશે નહીં.આથી કેટલાક દાવેદારો મતદારો ઓછા હોય તો જીત નિશ્ચિત માની રહ્યા હોય તેઓને આ સમય વધારે માફક આવી રહ્યો છે. અને આથી જ સરકારમાંથી જૂન મહિનામાં ચૂંટણી મંજૂર થાય તે માટેના પ્રયાસો કરવામાં આવી રહી છે પરંતુ લોકશાહી ઢબે ચૂંટણી કરાવવાની ઈચ્છા ધરાવતા લોકો ઓક્ટોબરમાં ચૂંટણી જાહેર થાય તેવી આશા રાખી રહ્યા છે.
